ASTANA. 21 mamyr. Astanada budan eki kún buryn úshti-kúıli joǵalyp ketken 11 jasar Jamal Beketova aman-esen tabyldy. Bul týraly Astana qalalyq ishki ister departamenti baspasóz qyzmetiniń aqparyna súıengen egemen.kz tilshisi habarlady.
«Iá, joǵalǵan qyzdyń tabylǵany ras», - dedi baspasóz qyzmetiniń qyzmetkerleri.
Eske sala keteıik, jasy kámeletke jetpegen qyz balanyń anasy Altynshash Beketova budan eki kún buryn, 19 mamyrda saǵat 23:00 shamasynda polısııaǵa qyzynyń aıaq astynan joǵalyp ketkenin aıtyp, shaǵymdanyp kelgen edi. Ol 2005 jyly týǵan Jamal Beketovanyń sol kúni shyǵyp ketkennen qaıtyp kelmegenin jetkizdi.
«Jedel-izdestirý sharalary kesheni barysynda joǵalyp ketken Jamal Beketovanyń júrgen jerleri anyqtaldy. Ol Astana qalasynyń Jeleznodorojnyı kentinen tabyldy. Oǵan qarsy eshqandaı zańǵa qarsy áreketter jasalmaǵan. Qazirgi sátte Astana qalasynyń Almaty aýdany ishki ister basqarmasynyń ıývenaldy polısııasynyń qyzmetkerleri qyzdy ata-anasyna aparyp tapsyrdy», - dep habarlady qalalyq ishki ister departamentiniń baspasóz qyzmetindegiler.
Polısııadaǵylar tekserý jumystarynyń nátıjesinde qyz balanyń budan buryn da úıden birneshe ret ketip qalǵanyn anyqtaǵanyn baıandady. Osyǵan baılanysty ishki ister qyzmetkerleri onyń ata-anasymen aldyn alý jumystaryn júrgizip te kelgen eken.
Atap ótetin jaıt, izdestirý jumystaryna volonterler men jergilikti turǵyndar da qatysqan. Qyzdyń joǵalǵany jaıyndaǵy habarlandyrýlar áleýmettik jelilerde de jarııalanǵan.
Talǵat Raıymbek.
Derek, foto: Astana qalasy ishki ister departamentiniń baspasóz qyzmeti.