KО́KShETAÝ. 21 mamyr. Aqmola oblysynda budan 11 kún buryn aıaq astynan joǵalyp ketken 2 jasar Ellına Kýldınanyń óli denesi tabyldy. Bul týraly oblystyq tótenshe jaǵdaılar departamenti baspasóz qyzmetiniń deregine súıengen egemen.kz tilshisi habarlady.
Departamenttiń kezekshilik bóliminiń málimetine sáıkes, búldirshin qyzdyń máıiti búgin keshki saǵat 20:55 shamasynda Nura ózeniniń arnasynan tabylǵan.
Eske sala keteıik, bóbektiń úshti-kúıli joǵalyp ketý oqıǵasy bıylǵy 10 mamyr kúni oblystyń Selınograd aýdanyna qarasty R.Qoshqarbaev atyndaǵy aýylynyń mańynda Nura ózeniniń jaǵasynda oryn alǵan bolatyn. Osy jerge taza aýa aıasynda demalýǵa kelgen úsh kisiden turatyn astanalyq otbasy músheleri, ıaǵnı ákesi men sheshesi ortalaryndaǵy jalǵyz bala - 2 jastaǵy qyzdarynan qapelimde kóz jazyp qalǵan.
Keıin ata-ananyń óz betterinshe júrgen kezderinde búldirshinniń ózen jaǵasyna qaraı ketip qalǵany belgili boldy. Sý jaǵasynan onyń oıynshyǵy tabyldy. О́zenniń osy tustaǵy jarynyń bıiktigi 6 metr bolady eken.
Osydan keıin balany jappaı izdestirý bastaldy. Oǵan qyzdyń ata-anasy, týǵan-týystary, polıseıler men qutqarýshylar jáne eriktiler qatystyryldy. Izdestirý jumystarynyń barysynda polıseılerdiń qyzdyń izine túsken ıisshil qyzmettik ıtteri ózenniń jaǵasyna alyp keldi.
Izdestirý jumystary barysynda volonterler tipti belgisiz bireýdiń beıitin qazýǵa deıin bardy.
Sońǵy kúnderi qyz balanyń ata-anasynyń ústinen Qylmystyq kodekstiń141-baby boıynsha qylmystyq is qozǵalǵan edi. Ol áke men sheshege «balanyń densaýlyǵy men ómiriniń qaýipsizdigin qamtamasyz etý mindetin tıisti deńgeıde oryndamaǵandary» úshin aıyp taqty. Onda kishkentaı qyzdyń joǵalýyna áke-sheshesiniń kináli ekeni dáleldense, olar 4,5 mıllıon teńge aıyppul tóleıtini nemese 2 jylǵa bas bostandyqtarynan aırylatyny aıtylǵan. Al balanyń óli denesi tabylǵan jaǵdaıda ata-anasy 5 jylǵa deıin sottalýy múmkin ekeni alǵa tartylǵan edi..
Baqbergen Amalbek.
Derek: Aqmola oblystyq tótenshe jaǵdaılar departamentiniń baspasóz qyzmeti.