Mańǵystaý oblysynda turǵyndardyń quqyqtyq kómekke qoljetimdiligin arttyrýǵa baǵyttalǵan «Tegin zań kómegi» aksııasy uıymdastyryldy. Is-shara halyqqa sapaly quqyqtyq qyzmet kórsetip, quqyqtyq saýattylyqty kúsheıtýdi kózdeıdi, dep jazady Egemen.kz.
Aksııa «Zań men tártip» qaǵıdatyn ilgeriletý aıasynda oblystyq Ádilet departamentiniń bastamasymen ótti. Oǵan «Azamattarǵa arnalǵan úkimet» memlekettik korporasııasynyń óńirlik fılıaly men oblys ákimdigi qoldaý kórsetti.
Sharanyń negizgi maqsaty – azamattarǵa qoljetimdi ári kásibı quqyqtyq keńes berý, quqyqtaryn qorǵaýdyń tıimdi joldaryn túsindirý jáne qoǵamda quqyqtyq mádenıetti qalyptastyrý. Sonymen qatar turǵyndardyń kúndelikti ómirde kezdesetin quqyqtyq máselelerin sheshýge naqty kómek kórsetýge basymdyq berildi.
Is-sharaǵa Ádilet departamentiniń basshysy A. Kárimov, «Azamattarǵa arnalǵan úkimet» memlekettik korporasııasy» KEAQ oblystyq fılıaly basshylyǵy, sondaı-aq zań qaýymdastyqtarynyń ókilderi qatysty. Notarıýstar, jeke sot oryndaýshylar, advokattar men zań konsýltanttary azamattarǵa tegin keńes berdi.
Aksııa barysynda ártúrli quqyq salalary boıynsha suraqtarǵa naqty túsindirmeler usynylyp, turǵyndarǵa jedel quqyqtyq kómek kórsetildi. Bul bastama halyqtyń memleketke degen senimin arttyrýǵa jáne quqyqtyq kómektiń qoljetimdiligin keńeıtýge yqpal etti.
Erteń zańgerler qazaqstandyqtarǵa tegin keńes beredi
Sonymen qatar Memleket basshysynyń tapsyrmalaryn iske asyrý sheńberinde óńirde quqyqtyq ınfraqurylym da damyp keledi. Búginde oblys boıynsha 50-ge jýyq eldi mekende quqyqtyq kabınetter ashylǵan. Olar aýyldyq okrýg ákimdikteriniń ǵımarattarynda ornalasyp, zamanaýı tehnıkalyq quraldarmen jabdyqtalǵan.
Atalǵan kabınetter arqyly turǵyndar «Ádilet» aqparattyq-quqyqtyq júıesine, «Zań» derekter bazasyna, sondaı-aq eGov, e-О́tinish, «Ashyq NQA» platformalaryna qol jetkize alady.
Bul múmkindik ásirese shalǵaı aýyldarda turatyn jáne áleýmettik turǵydan osal toptarǵa jatatyn azamattar úshin mańyzdy. Quqyqtyq kabınetter halyqtyń quqyqtyq saýatyn arttyryp, memlekettik qyzmetterge qoljetimdilikti keńeıtýge jol ashyp otyr.
Jalpy, Mańǵystaý oblysy Ádilet departamenti azamattardyń quqyqtyq kómekke suranysyn qamtamasyz etý baǵytynda júıeli jumys júrgizip keledi. Memlekettik organdar men zań qaýymdastyqtarymen birlesken bul bastamalar aldaǵy ýaqytta da jalǵasyp, azamattardyń quqyqtary men zańdy múddelerin qorǵaýǵa qyzmet etpek.
Alaıaqtyqtyń aldyn alý: Ustazdar arasynda arnaıy aksııa uıymdastyryldy