Mańǵystaý oblysynyń Túpqaraǵan aýdanyndaǵy Kaspıı teńizi jaǵalaýynda 97 ıtbalyqtyń óleksesi anyqtaldy. Mamandardyń aldyn ala boljamynsha, janýarlar bir aıdan astam ýaqyt buryn qyrylǵan, al olardy jaǵalaýǵa batys jeli aıdap shyǵarǵan, dep jazady Egemen.kz.
Búgin «Kaspıı ıtbalyǵy» memlekettik tabıǵı rezervaty qyzmetkerleri Jaıyq – Kaspıı oblysaralyq balyq sharýashylyǵy basseındik ınspeksııasy jáne Túpqaraǵan aýdanynyń jergilikti atqarýshy organdarymen birlesip teńiz jaǵalaýyn monıtorıngteý barysynda jaǵaǵa shyǵyp qalǵan ıtbalyq ólekselerin anyqtaǵan.
Kaspıı jaǵalaýynan júzden astam óli ıtbalyq tabyldy
Saǵat 11:00-degi jaǵdaı boıynsha, batystan soqqan qatty jeldiń áserinen jaǵalaýǵa barlyǵy 97 ólekse shyǵarylǵan.
Qazirgi ýaqytta qoldanystaǵy erejelerge sáıkes arnaıy jumys toby qurylyp, oqıǵa ornyna birqatar mekeme ókilderi jiberildi. Olardyń qatarynda «Kaspıı ıtbalyǵy» rezervaty, balyq sharýashylyǵy ınspeksııasy, jergilikti ákimdik, ishki ister bólimi, ekologııa departamenti, veterınarııalyq baqylaý jáne qadaǵalaý qyzmeti, Gıdrobıologııa jáne ekologııa ınstıtýty, Kaspıı ıtbalyǵyn zertteý jáne ońaltý ortalyǵy, sondaı-aq «Qazaq balyk» respýblıkalyq qaýymdastyǵy bar.
Mamandar ólekselerden synama alyp, janýarlardyń qyrylý sebepterin anyqtaý jáne olardy joıý jumystaryn uıymdastyryp jatyr.
Gıdrobıologııa jáne ekologııa ınstıtýtynyń málimetinshe, ıtbalyqtardyń ólimi shamamen bir aı buryn bolǵan, alaıda olardyń deneleri teńizdegi daýyldyń áserinen endi ǵana jaǵalaýǵa jetken.
Kaspıı ıtbalyqtaryna áýeden sholý jasaldy
Qazirgi ýaqytta jaǵalaýdy baqylaý jumystary jalǵasyp jatyr. Jaǵdaı turaqty baqylaýǵa alynǵan.