Qazaq Geografııalyq qoǵamy Shejire DNA jobasymen jáne norvegııalyq ǵalymdarmen birlese otyryp, Qazaqstan men Skandınavııa arasyndaǵy etnografııalyq jáne mádenı baılanystar zertteletin ǵylymı jobany júzege asyrýda.
Almaty qalasynda Qazaqstannyń tarıhy men mádenıeti týraly derekti fılm túsirýmen, sondaı-aq el turǵyndarynyń etnogenetıkalyq sáıkestikterin ǵylymı turǵyda zerttep júrgen norvegııalyq ǵalymdar delegasııasy óz eńbekteriniń esebimen tilshiler qaýymyn tanystyrdy.
Halyqaralyq ǵalymdar toby «ejelde Ortalyq Azııa úndieýropalyq tilderdiń ortalyǵy bolǵan» degen boljamǵa saı, Qazaqstan men Skandınavııa halyqtarynyń etnografııalyq jáne mádenı baılanystary týraly gıpotezany birneshe jyldar boıy zerttep keledi. Osy ǵylymı joba álem ǵalymdarynyń nazaryn ózine aýdaryp, elimizde norvegııalyq «NRK» telearnasy túsirip júrgen ǵylymı-tanymdyq baǵdarlamanyń basty epızodyna aınalyp otyr.
Qazaq Geografııalyq qoǵamynyń negizgi baǵyttarynyń biri – búkil álemge Qazaq eliniń mádenıetin, tarıhyn tanystyrý bolǵandyqtan, atalmysh joba otandyq geografııalyq qoǵam tarapynan da zor qoldaýǵa ıe bolýda.
Qazaqstan halqy Assambleıasynyń qoldaýymen ótkizilgen bul basqosýda norvegııalyq ǵalym ári «NRK» telearnasynyń jýrnalısti Djo Roslıen jýrnalısterge arnalǵan sheberlik-synyp ótkizip, tarıhshy-ǵalym Strýla Ellıngvag, «Qazaq Geografııalyq Qoǵamy» tóraǵasynyń orynbasary, Shejire DNA project dırektory Nurbol Baımuhanov túrli ǵylymı tujyrymdamalarymen bólisti.
Qanat ESKENDIR,
«Egemen Qazaqstan»
ALMATY