Memleket basshysy Qasym-Jomart Toqaev ǵalymdardy marapattaý rásiminde sóz sóıledi, dep jazady Egemen.kz.
Prezıdent óz sózinde uly tulǵalardy ulyqtaý jumysyna tyń serpin berý asa mańyzdy ekenin atap ótti.
«Biz zııatkerlik muramyzdy maqtan tutamyz. Ál-Farabı, Ahmet Iаsaýı, Abaı syndy ǵulamalarymyz sońyna sarqylmas rýhanı qazyna qaldyrdy. Olardyń eńbekteri álemdik aqyl-oıdyń altyn qoryna kiredi. Danyshpan babalarymyzdyń baǵa jetpes týyndylaryn zaman talabyna saı kádege jarata bilýimiz kerek. Oıshyldarymyz ben ǵalymdarymyzdyń murasyn tereń tanyp, keńinen dáriptep, barynsha damytqan jón. Uly tulǵalardy ulyqtaý jumysyna tyń serpin berý asa mańyzdy», dedi Memleket basshysy.
Sondaı-aq Qasym-Jomart Toqaev Qoja Ahmet Iаsaýı tulǵasyn elimizdiń árbir aımaǵynda jáne shetelde de keńinen dáripteý qajet ekenine nazar aýdardy.
«Bárimiz áıgili Qoja Ahmet Iаsaýıdi biregeı ǵulama ǵalym ári órkenıettanýshy retinde elimizdiń árbir aımaǵynda jáne shetelde de keńinen dáripteýimiz kerek. Sonymen birge onyń qundylyǵy asa zor baı murasyn ózimiz de barlyq turǵydan jan-jaqty zertteýimiz qajet. Osy ónegeli dástúr bıyl ál-Farabı forýmyna ulasady. Mundaı taǵylymy mol, ǵylymı máni zor basqosýlar jyl saıyn ótkizilip turady», dedi Prezıdent.
Prezıdent jıynda joǵary memlekettik marapattar tizimine «Ál-Farabı» ordeni engiziletinin málimdep, qazaqstandyq ǵalymdardy marapattady. Al bir top jas ǵalymǵa páter kiltterin tabystady.