Aldaǵy úsh táýlikte Qazaqstannyń basym bóliginde antısıklondardyń jıi almasýyna baılanysty qubylmaly aýa raıy saqtalady. «Qazgıdromet» sınoptıkteri 11, 12 jáne 13 sáýir kúnderine arnalǵan aýa raıy boljamyn jarııalady, dep habarlaıdy Egemen.kz.
Mamandardyń málimetinshe, elimizdiń batys jáne ońtústik óńirlerinde jańbyr jaýyp, naızaǵaı oınaıdy dep kútiledi. Al soltústik-batys, soltústik, ortalyq jáne shyǵys aımaqtarda túnde jáne kúndiz jańbyr jaýady. 11 sáýirge qaraǵan túni shyǵys óńirlerde qar jaýýy múmkin.
«11 sáýirde respýblıkanyń batysynda qatty jańbyr jaýyp, burshaq túsýi yqtımal. Sondaı-aq Qazaqstan aýmaǵynyń basym bóliginde tuman túsedi dep boljanǵan», delingen habarlamada.
Sınoptıkter qubylmaly aýa raıy kezinde azamattardy, ásirese kólik júrgizýshilerin joldarda saq bolýǵa jáne tuman kezindegi qaýipsizdik erejelerin saqtaýǵa shaqyrady.
Eske sala keteıik, 10 sáýir kúni Qazaqstannyń bes qalasynda atmosferalyq aýanyń lastanýyna yqpal etetin qolaısyz meteorologııalyq jaǵdaılar boljanyp otyr.