Keshe Prezıdent janyndaǵy Ortalyq kommýnıkasııalar qyzmetinde «Jastar úsh tuǵyrly til saıasatyn qoldaıdy. Qazaqstandaǵy jastar damýynyń basty baǵdarlary» taqyrybynda brıfıng ótti.
Brıfıngke «Qazaqstan jastar kongresi» zańdy tulǵalar birlestiginiń atqarýshy dırektory Aıdyn Sábıtov, «Saryarqa» kásipkerler qaýymdastyǵy basqarma keńesiniń múshesi Erık Saǵıev, «Jas Ulan» birikken balalar men jasóspirimder uıymy tóraǵasynyń orynbasary Aleksandr Ten, Qazaqstan stýdentteri Alıansynyń jetekshisi Merjan Ábilqas jáne Astanadaǵy daryndy er balalarǵa arnalǵan qazaq-túrik lıseıiniń muǵalimi Áset Qabdıev qatysty.
Brıfıng barysynda Aıdyn Sábıtov úsh tilde bilim berý júıesin mektepter men joǵary oqý oryndaryna engizý qajettigin 300 myńnan astam qazaqstandyq jastar qýattap otyrǵanyn jetkizdi. Onyń aıtýynsha, bul máselede «Qazaqstan jastar kongresi» ZTB, «Jasyl el» jastar eńbek jasaǵynyń respýblıkalyq shtaby, «Bolashaq» stıpendıattary qaýymdastyǵy jáne basqa da uıymdar erekshe qoldaý bildirgen.
Jıynda jastar uıymdarynyń ókilderi qazirgi tańda halyqaralyq aǵylshyn tilin bilýdiń mańyzdylyǵyn Qazaqstannyń árbir jas azamaty túsinetinin, úsh tildi bilýdiń keleshekke jol ashatynyn atap ótti. Olardyń sózine qaraǵanda, bolashaqta Qazaqstandy jańa býyn damytady, sondyqtan memleketimizdiń erteń álemniń aldyńǵy qatarly elderimen bir deńgeıde bolý úshin jastar aǵylshyn tiline nemquraıly qaraı almaıdy.
Jıynda Erık Saǵıev, Merjan Ábilqas, Áset Qabdıev jáne Aleksandr Ten óz oılaryn ortaǵa salyp, úsh tuǵyrly til saıasatyn júrgizý ýaqyt talaby ekenin jetkizdi. Sondaı-aq, olar memlekettik tilimizdiń mereıin ósirý baǵytyndaǵy jumystardy da kún tártibinen túsirmeý kerektigine basa nazar aýdardy. Máselen, qazaqsha erkin sóıleıtin Aleksandr Ten memlekettik tildi úırený men damytýdyń mańyzdylyǵyn aıta kelip, aǵylshyn tilin bilýdiń de ýaqyt talaby bolyp turǵanyn kóldeneń tartty. Onyń aıtýynsha, óskeleń urpaqqa álemdik ǵylym jetistikterine qol jetkizý, halyqaralyq údemeli tájirıbelerdi meńgerý qajet. Sondyqtan, aǵylshyn tilin bilý óte mańyzdy. Sondaı-aq, ol úsh tuǵyrly til saıasaty barlyq jastarǵa teń múmkindikter beretinine erekshe atap kórsetti.
Joldybaı BAZAR,
«Egemen Qazaqstan»