Parlament Májilisi Tóraǵasynyń orynbasary Gúlmıra Isimbaeva Latvııa Saeımi (Parlament) Tóraǵasynyń orynbasary Lıbınıa-Egneremen kezdesti, dep habarlady Májilistiń baspasóz qyzmeti.
Aıta keteıik, Latvııa delegasııasy Astanaǵa «Dinder terrorızmge qarsy» halyqaralyq forýmyna qatysý úshin arnaıy kelgen bolatyn.
Kezdesý barysynda parlamentaralyq ózara is-qımyl máselelerine aıryqsha kóńil bóline otyryp, Qazaqstan-Latvııa qarym-qatynasyn damytýǵa basa nazar aýdaryldy. Taraptar atap ótkendeı, kópjaqty yqpaldastyq jáne halyqaralyq saıasattaǵy ózekti máseleler tóńireginde bizdiń elderimizdiń ustanymdary óte uqsas.
Osy rette vıse-spıkerler bizdiń elderimiz múshesi bolyp tabylatyn BUU alańdary, basqa da halyqaralyq platforma aıasynda jan-jaqty áriptestik turǵysynan qolǵa alynyp jatqan sharalarǵa toqtaldy. G.Isimbaeva Latvııa tarapyna Qazaqstannyń DSU-ǵa kirý jáne 2017-2018 jyldary BUU Qaýipsizdik Keńesiniń turaqty emes músheligine kandıdatýrasyn qoldaǵany úshin alǵysyn jetkizdi. Sonymen qatar, Astanada ótetin «EKSPO-2017» kórmesiniń daıyndyq jáne ótý barysynda Latvııanyń belsene qatysatynyna senim bildirdi.
G.Isimbaeva mártebeli meımandy Májilistiń qazirgi tynys-tirshiligimen tanystyryp, Qazaqstan Prezıdentiniń bes ınstıtýttyq reformasyn, «Qazaqstan-2050» Strategııasyn zańnamalyq qoldaý turǵysynda atqarylyp jatqan jumystardan habardar etti.
Lıbınıa-Egnere Latvııa Saeımi Tóraǵasynyń atynan Májilis Spıkerine berý úshin Latvııaǵa resmı saparmen kelýge shaqyrýdy tabys etti.