Bul – jahandyq maqsattarǵa qosylatyn naqty úles

BUU-nyń Nıý-Iorktegi shtab-páterinde Qazaqstan Respýblıkasynyń BUU-nyń energetıka boıynsha Turaqty damý maqsattaryn iske asyrýǵa qosqan úlesi týraly joǵary deńgeıdegi is-shara ótkizildi. Onyń sheńberinde Astana qala­synda ótetin EKSPO-2017 kórme­sin tanystyrý rásimi boldy. Sha­ra­­ny uıymdastyrýǵa Qazaqstan Res­pýb­lıkasynyń BUU janyndaǵy Turaqty ókildigi, BUU Ekonomıkalyq jáne áleý­­mettik máseleler departamenti, eń nashar damyǵan elder, teńizge shyǵý múm­kindigi joq damýshy elder jáne shaǵyn araldyq damýshy elder boıynsha BUU Bas hatshysynyń orynbasarynyń ofısi qatysty. Kezdesýdiń tabysty ótýine «Astana EKSPO-2017» ulttyq kompanııasy, Nazarbaev Ýnıversıtet jáne G-Global halyq­aralyq hatshylyǵy óz úlesin qosty. Is-sharaǵa qatysýshylar – BUU ja­nyndaǵy Turaqty ókildikterdiń elshileri men sarapshylary, úkimettik emes uıymdardyń, ǵylymı jáne isker­lik toptardyń ókilderi 2030 jylǵa qa­raı energııaǵa jalpyǵa birdeı qol­jetimdilikti qamtamasyz etý úshin BUU-nyń, ulttyq úkimetterdiń, bıznestiń, azamattyq qoǵam men basqa da múddeli taraptardyń kúsh-jigerin úılestirý boıynsha pikir almasty. Is-shara barysynda BUU Bas hat­shysynyń orynbasary Gıan Chandra Acharııa, BUU Bas hatshysynyń Eko­nomıkalyq damý boıynsha kómekshisi Lennı Montıel, BUU Bas hatshysynyń arnaıy ókili – barsha úshin turaqty energetıka bastamasynyń jetekshisi Reı­chel Kaıt, Nazarbaev Ýnıversıtettiń ınnovasııalar boıynsha vıse-prezıdenti Qanat Baıǵarın, G-Global basshysynyń orynbasary Murat Qarymsaqov, úki­met­tik emes uıym­dardyń, akademııalyq jáne iskerlik toptardyń ókilderi sóz sóıledi. EKSPO-2017 ókili Rýslan Jemkov kórmege daıyndyq barysy jáne salynǵan obektilerdi kórmeden keıingi paıdalaný týraly egjeı-tegjeıli áńgimelep, onyń tusaýkeserin jasady. Qatysýshylar energııa tıimdiligin arttyrý, balamaly ener­gııa kózderin damytý jáne qazirgi zamanǵy energııa kózderiniń jalpyǵa birdeı qoljetimdiligin qamtamasyz etý salasyndaǵy ulttyq saıasatpen tanys­tyryldy. Sondaı-aq, Qazaqstan Prezıdenti Nursultan Nazarbaevtyń Astanada BUU qamqorlyǵymen «jasyl» tehnologııalar men ınvestısııalyq jobalardy damytý boıynsha halyqaralyq ortalyq qurý bastamasyna qatysty aqparat berildi. Sońynan ótken talqylaý barysynda is-sharaǵa qatysýshylar «Bola­shaqtyń energııasy» taqyrybynda EKSPO-2017 mamandandyrylǵan halyqaralyq kór­mesin ótkizý Qazaqstannyń energetıka salasyndaǵy jahandyq maqsattarǵa jetýge qosatyn naqty úlesi bolyp tabylatynyn atap ótti.