Syrtqy ister mınıstri Erlan Ydyrysov Túrkitildes memleketterdiń yntymaqtastyq keńesiniń (TMYK) Bas hatshysy Ramıl Gasanovpen kezdesý ótkizdi. Kezdesý barysynda Qazaqstannyń TMYK-men ózara árekettestik máseleleri, aǵymdaǵy jyldyń kúzinde Qyrǵyzstanda ótetin Uıymǵa múshe-memleketter basshylary keńesiniń otyrysyna daıyndyq jaıy talqylandy.
R.Gasanov Túrki keńesiniń jyl basynan bastap jasaǵan jumysy men taıaý aradaǵy ýaqytqa arnalǵan josparlary týraly aıtyp berdi. Ol Astanaǵa TMYK-ge múshe-memleketterdiń jas dıplomattaryna arnalǵan birlesken kýrstardyń 3-shi baǵdarlamasynyń tyndaýshylaryna sertıfıkattar berý saltanatyna qatysý úshin kelgenin aıtty. «Atalǵan baǵdarlama yntymaqtastyqty damytýǵa jáne TMYK-ge múshe-memleketter syrtqy saıasat vedomstvolaryn jaqyndastyrýǵa baǵyttalǵan, sondaı-aq, memleketter basshylarynyń ýaǵdalastyqtaryn iske asyrýdaǵy tájirıbelik qadam bolyp tabylady», – dedi R.Gasanov.
О́z kezeginde, E.Ydyrysov TMYK Hatshylyǵynyń uıymnyń aldaǵy sammıtine daıyndyǵyna qatysty jáne Túrki keńesi elderi arasyndaǵy yntymaqtastyq máselelerin úılestirý isindegi jalpy qyzmetin joǵary baǵalady.
Túrkitildes memleketterdiń yntymaqtastyq keńesi nemese Túrki keńesi – Qazaqstan Prezıdenti Nursultan Nazarbaevtyń bastamasymen 2009 jylǵy qazan aıynda qurylǵan halyqaralyq uıym. TMYK músheleri: Ázerbaıjan, Qazaqstan, Qyrǵyzstan jáne Túrkııa bolyp tabylady. Uıym hatshylyǵy Ystanbul qalasynda ornalasqan.
«Egemen-aqparat»