Rýhanııat pen ádebıettiń janashyrlary, oqyrmandary barda ol eshqashan ólmeıdi, ár ýaqytta jasaı bermek. Eýrazııa ulttyq ýnıversıteti qabyrǵasynda osy bir ádemi qaǵıdanyń rastyǵyna taǵy bir kózimiz jetti. Keler urpaqqa mıras bolar, búgingi býynnyń sanasyn jetildirer úsh birdeı týyndy qalyń qaýymǵa jol tartty. Fılosof, professor Ǵarıfolla Esimniń «Tanym kókjıegi», belgili aqyn Serik Aqsuńqarulynyń «Kókeıimde – Kúlteginniń jazýy», jas aqyn Dınara Málikqyzynyń «О́mir degeniń osy eken» kitaptarynyń tusaýy kesildi. Mundaı ıgi iske uıytqy bolǵan azamat – kópshilik tanıtyn jazýshy, ekonomıka ǵylymdarynyń doktory Myrzageldi Kemel. Úsh avtordyń da eńbekterin jınaqtap, eń qundy degen shyǵarmalaryn, tushymdy oılaryn kóz maıyn taýysyp terip alyp, óńdep baspaǵa bergen eken.
Jıynǵa kitap avtorlarymen qatar, ýnıversıtet prorektory Dıhan Qamzabekuly, oqý ornynyń ustazdary men oqyrman jastar qatysty. Alǵashqy bolyp sóz alǵan Ǵarıfolla Esim «Jaqsylyq degenimiz, shyn máninde, eshqandaı aqysyz, mindetteýsiz jasalǵan maqsatty is. Biz aıtyp júrgen shapaǵat, jomarttyq atty uǵymdar da osynyń aıasyna syıady. Búgin, mine, soǵan rasynda kýá bolyp otyrmyz. Mundaı sharýalar, rýhanııatqa degen is júzindegi janashyrlyq ózge azamattarymyzǵa da úlgi bolsa eken», dep joba avtoryna kitap avtorlarynyń atynan shyn júrekten alǵysyn jetkizdi.
Serik Aqsuńqaruly men Dınara Málikqyzy arqalana óleń oqydy. Belgili aqyndar Ońaıgúl Turjan, Janat Áskerbekqyzy, ádebıettanýshy Omar Jáleluly jáne basqa da qonaqtar, stýdentter sóz alyp, lebiz bildirdi. Tusaýkeserdi júrgizip otyrǵan Dıhan Qamzabekuly «Bul kesh – kitapsúıer qaýymnyń, ádebıettiń, izgiliktiń keshi boldy», dep qorytyndylady.
Abaı SEIFÝLLAULY,
L.N. Gýmılev atyndaǵy EUÝ stýdenti
ASTANA