Balalar densaýlyǵy kúzetinde

* 19 maýsym – Medısına qyzmetkeri kúni Elordanyń emhanalarynda naqty salanyń mamandaryna (ýzkıı spesıalıst) qaralýdyń qanshalyqty qıyn ekenin qala turǵyndary jaqsy biledi. Bul kúrdeli máseleden balalar emhanalary da syrt qalǵan joq. Osyndaı jaǵdaıda №2 qalalyq balalar aýrýhanasyna qarasty emhanada 29 túrli medısına salasynyń mamandary qabyldaý jasaıdy eken. Bir emhanada otyzǵa tarta sala mamandary balalar densaýlyǵyna arasha turady! Tamasha múmkindik! «Jaqsyny kórmek úshin» de­mekshi, atbasyn atalmysh emdeý ortalyǵyna buryp, ozyq tá­jirıbemen tanysýǵa asyqtyq. Bizdi №2 qalalyq balalar aýrýhanasy pedıatrııa bóliminiń jetekshisi, joǵary sanattaǵy dáriger Gúlnar Ablıaeva qarsy aldy. Búkil sanaly ǵumyryn balalar densaýlyǵynyń kúzetine arnap kele jatqan Gúlnar Rústemqyzynyń salıqaly eńbek joly da ónege tutýǵa turarlyq eken. Ol – búgingi Astana medı­sınalyq ýnıversıtetinde 1979 jyly alǵash ret ashylǵan pedıatrııa fakýltetiniń tuńǵysh túlekteriniń biri. 1989 jyly elordadaǵy №1 qalalyq balalar aýrýhanasynda dáriger bolyp qyzmet kórsete bastaǵan­nan bergi ýaqytta barlyq bilimi men tájirıbesin kishkentaı asta­nalyqtardyń myqty densaýlyǵy jolyna sarp etip keledi. – 350 tósektik aýrýhana jáne bir aýysymda 250 búldirshinderdi qabyldaıtyn emhanadan quralǵan bizdiń medısınalyq keshen búgingi halyqaralyq medısınalyq stan­darttarǵa tolyq jaýap beredi, – dep bastady áńgimesin №2 qalalyq balalar aýrýhanasy pedıatrııa bóliminiń basshysy. – Bizdiń orta­lyqta negizinen medısınanyń eń kúrdeli de jaýapty salasy – medısınalyq hırýrgııaǵa ba­symdyq berilgen. №2 balalar aýrýhanasy elordadaǵy ýrgenttik ortalyq bolyp sanalady. Iаǵ­nı, qalamyzdaǵy balalarǵa qatysty barlyq medısınalyq jedel kómek osy ortalyq ar­qyly kórsetiledi. Aýrýhana men emhana medısına salasy je­tistikteriniń eń ozyq úlgilerimen jabdyqtalǵan. Tekseristen ótetin búldirshinderdiń densaýlyq dá­re­jesin dál anyqtaıtyn sáý­leli dıagnostıkalyq rentgen, ýl­tradybystyq qondyrǵylar, birden 64 spıraldik kórinis jasaıtyn kompıýterlik-tomograf, ıadrolyq magnıttik rezonansty tomograf bizdiń medısınalyq keshenniń shyn maqtanyshy bolyp tabylady. Joǵaryda aıtyp ótkenimizdeı, №2 balalar aýrýhanasynyń emhana bóliminde medısına salasynyń naqty 29 túriniń mamandary qyzmet kórsetedi. Atap aıtqanda, epıleptolog, revmatolog, nevropotolog, kardıolog, gematolog, gınekolog, ýrolog, nefrolog, allergolog, prok­tolog, sýrdolog jáne basqa sırek kezdesetin mamandyq ıeleri osy emhanadan tabylady. Qazir emhana bóliminde 45 joǵary sanatty maman, onyń ishin­de 3 medısına ǵylymdarynyń kandıdaty qyzmet jasaıdy. Ártúrli salanyń tájirıbeli mamandaryn ortaq iske jumyldyryp, emhananyń elordadaǵy irgeli de bilikti keńestik-dıagnostıkalyq ortalyqqa aınalýyna emhana bóli­miniń basshysy, «Densaýlyq saqtaý isine qosqan úlesi úshin» tósbelgisiniń ıegeri, tájirıbeli maman Gúlnar Ablıaevanyń qosqan úlesi ólsheýsiz. Onyń osyndaı isker uıymdastyrýshylyq qabiletiniń shyńdalýyna osy medısınalyq keshende qalyptasqan joǵary kásibı sheberlik mektebiniń yqpaly zor bolǵandyǵy daýsyz. 2004 jyly qalamyzdaǵy №2 bala­lar aýrýhanasynyń janynan alǵash ret emhana ortalyǵy ashylǵan bolatyn. Sol jyly Gúlnar Ablıaeva osy jas ujymǵa dáriger-pýlmonolog retinde jumysqa qabyldandy. Al 2007 jyly №2 balalar aýrýhanasy bas dárigeriniń emdeý jumysy jónindegi orynbasary bolyp taǵaıyndaldy. 2012 jyldan bastap №2 balalar aýrýhanasy bas dárigeriniń emhana jumysy jónindegi orynbasary qyzmetin atqaryp keledi. Búginde atalmysh emhanada búldirshinderdiń boıyndaǵy sırek kezdesetin syrqattardy der kezinde anyqtap, ýaqytynda tıimdi emdeý sharalaryn júrgizýge barynsha jaǵdaı jasalǵan. – Elordadaǵy halyqaralyq joǵary medısınalyq standart­tarǵa saı jańa úlgidegi osy balalar aýrýhanasynyń bazasynda Astana medısınalyq ýnıversıtetiniń balalar hırýrgııasy jáne pedıatrııa kafedralary jumys isteıdi. Jalpy, bizdiń aýrýhanada balalar hırýrgııasy salasyna basymdyq berilip, osy kúrdeli sala boıynsha ujymnyń joǵary talap údesinen kórinýine aýrýhananyń bas dá­­rigeri, medısına ǵylymdarynyń doktory, professor, elimiz boıynsha balalar hırýrgııasynyń qazirgi ýaqyttaǵy bilikti mamany Rasýlbek Rahmanberdiuly Aıpovtyń sińirgen eńbegi zor, deıdi úzilgen áńgimesin odan ári sabaqtaǵan Gúlnar Rústemqyzy. Osy rette erekshe atap ótetin bir másele, bizdiń aýrýhanada sońǵy kezde búldirshinderdiń bet-jaq múshelerin emdeý bólimshesi ashyldy. О́mirge endi ǵana kelgen nárestelerdiń arasynda erni jyryq, tańdaıy joq jáne basqa týa bitken kemistikteri bar sábılerdiń kezdesetini jasyryn emes. Buryn mundaı sábılerge ota jasaý úshin respýblıkalyq ortalyqtarǵa, tipti shetel mamandarynyń kóme­gine júginý qajet bolatyn. №2 qalalyq balalar aýrýhanasynda ashylǵan búldirshinderdiń bet-jaq múshelerin emdeý bólimshesi týa bitken kemistigi bar mundaı nárestelerge birden ota jasap, qulan-taza saýyqtyryp jiberedi. Emhana bólimi jetekshisiniń aıtýy boıynsha, buryn qalamyzda jazataıym kúıikke shaldyqqan, úsikke ushyraǵan balalardy em­deıtin jeke ortalyq bolmaǵan eken. Mundaı búldirshinder eresekter aýrýhanasyndaǵy arnaıy bólimderde emdelip kelgen. Onyń ózindik qıyndyqtary da kóp boldy. О́ıtkeni, kúıik, úsik sııaqty jazataıym apattarǵa balalardyń jıi ushyraıtyndyǵy belgili. Mine, sondyqtan atalmysh medısınalyq keshende ashylǵan balalardy kúıik­ten jáne úsikten emdeý orta­lyǵy respýblıkamyzdyń balalar medısınasy salasyndaǵy úlken je­tis­tikterdiń biri ekendigi daýsyz. О́mirdiń qaı salasy bolmasyn, bilikti mamanǵa júkteletin jaýapkershilik júgi úlken. Bul máseleniń, ásirese, densaýlyq salasynda salmaǵy erekshe artatyny da aqıqat. «Bizdiń №2 qalalyq balalar aýrýhanasynyń medısınalyq qyzmet sapasyn jáne emdeý sharalarynyń tıimdiligin arttyra otyryp, qalamyzdaǵy emdeý ortalyqtarynyń kóshbasy­nan kórinýine ujymdaǵy tájirı­beli de bilikti mamandardyń eń­begi zor. Bul rette joǵary sanattaǵy dáriger-kardıolog Ǵaısha Baltashevanyń, joǵary sanattaǵy dáriger-nevropatolog Alııa Dosymbekovanyń, joǵary sanattaǵy dá­riger-travmatolog-ortoped Na­talıa Chjen jáne bas­qalardyń esimin erekshe atap ótken jón», deıdi emhana bóliminiń jetekshisi Gúlnar Ablıaeva árip­testeriniń eńbegine degen zor iltıpat sezimmen. Elordadaǵy eńseli de irgeli emdeý ortalyǵyndaǵy qalyptasqan osy bir joǵary eńbek ahýaly men jas astanalyqtarǵa kórsetiletin sapaly medısınalyq qyzmetke kýá bolyp, kóńilimiz shynaıy alǵys sezimine toldy. Sonymen birge, osy mamyrajaı maýsym aıynda elimiz boıynsha erekshe atalyp ótiletin densaýlyq saqtaý salasy qyzmetkerleriniń kásibı merekesimen aq halatty abzal jandardy shyn júrekten quttyqtap, sáttilik jáne tabys tiledik. Jylqybaı JAǴYPARULY, «Egemen Qazaqstan» Astana