Jaqsy ómirge baǵyttaıdy

«Nur Otan» HDP Qostanaı qalalyq fılıalynyń músheleri shahardaǵy iri kásiporyndardy aralady. Aldymen «AgromashHoldıng» aksıonerlik qoǵamyna kelgende, osy kásiporynnyń 400 jumysshysy máshıne qurastyratyn  atshaptyrym sehqa qoıylǵan ekran arqyly Elbasy Nursultan Nazarbaevtyń Qa­zaqstan halqyna Joldaýyn tyńdap otyrǵan edi. Nur­otan­dyq­tar da otyra qalyp, Elbasy Joldaýyn zaýyt jumys­shy­lary­men birge kórip, tamashalady. Joldaý aıaqtalǵan soń  «Nur Otan» HDP Qostanaı qalalyq  fılıalynyń tóraıymy, pedagogıka  ǵylymdarynyń doktory, professor Rımma BEK­TURǴANOVANY áńgimege tartqan edik: – Rımma Shyńǵysqyzy, Jol­daýdan alǵan áserińiz qan­daı? – Men jáne meniń árip­tes­terim de úlken áser qusha­ǵyn­da­myz. Prezıdent Joldaýyn seh jumysshylarymen birge kórip, tyńdadyq. Jumys­shy­lar­dyń ekranǵa asa zeıinmen qa­raǵany kóńildi toltyra tús­kendeı. Mine, asa iri «AgromashHoldıng» zaýyty jumys istep tur. Qanshama adam osy sehtan tabys taýyp, otba­sy­la­ryn asyrap otyr. Sońǵy kezde zaýyt koreıalyq máshıneler qu­rastyra bastady. Osyndaı iri jobanyń júzege asýy álemdik deńgeıdegi saıası qaıratker jáne dana ekonomıst Prezı­dentimizdiń arqasy ekenin eshkim joqqa shyǵara almaıdy. Elbasymyz Nursultan Na­zar­baevtyń ózi de maǵan joǵary kóńil-kúıde sııaqty kórindi. Negizi Nursultan Ábishulynyń sheshendigine esh daý joq. Jol­daýdaǵy ár sózi optımızmge to­ly, tyńdaýshynyń da rýhyn kóterip tastady. Ol kisiniń só­zin­de bosqa urandatý joq, jetken jetistikterimizben qatar, kemshilikterdi de búkpesiz aıt­ty. Ár qazaqstandyqtyń kózin shyndyqqa jetkizgendeı, naqty ómirdiń kórinisin berdi. Aldaǵy kúnderge adastyrmaı baǵyt­taı­tyn Joldaý bizge osyndaı shy­naıylyǵymen qymbat der edim. – Joldaýda aıtylǵan qan­daı máseleler kóbirek una­dy? – Prezıdent aldymen halyq­tyń áleýmettik jaǵdaıyna kóńil bóledi. Al bul – ekonomıkany damytqanda ǵana múmkin bolatyn jaǵdaı. Sondyqtan Nursultan Ábishuly bıznesti, shaǵyn jáne orta bıznesti damytýǵa taǵy da nazar aýdardy. Al osy Joldaýda bilim berý isiniń máseleleri elimizde kókeıkesti ekeni baıqaldy. Elbasy memlekettiń órkenıetti elder qatarynan kórinýine birden-bir tirek bolatyn saladaǵy kemshilikterdi de jasyrmady. My­sa­ly, osy kezge deıin eshqandaı ǵy­lymı konferensııalarda, basqo­sý­larda eshqandaı ǵylymı baıandama jasap kórmegen kisilerdi su­rastyra kelseń ǵylym kandı­daty nemese dardaı ǵylym doktor ekenin bilesiń. Ǵylymdaǵy kóz­boıaýshylyq elimizdiń erteńi úshin qaýipti nárse. Dısserta­sııa­lyq keńestiń jabylatynyn men de qoldaımyn. Prezıdent durys aıtty. – Joldaýda aıtylǵan máse­le­­ler­di ýaqtyly júzege asyrý úshin ne isteý kerek dep oı­laı­syz? – Negizi, Prezıdent jol­daý­larynda aıtylǵan jaılar Táýel­siz memleketimizdi jar­qyn isterge baǵyttaý bolyp ta­by­lady dedim ǵoı. Al budan bu­rynǵy joldaýlaryndaǵy qa­daý-qadaý máseleler birtindep ómirlik shyndyqqa aınalyp keledi. Mysaly, ekonomıkany úde­meli ınnovasııalyq-ınves­tı­sııalyq damytý baǵdar­la­ma­sy, taǵy basqa mysaldar jetkilikti emes pe? Bilim berý sa­la­synda da sony ister qolǵa aly­nyp jatyr. Júıeni pysyqtaý jóninde osy Joldaýda aıtyl­ǵan­dardyń barlyǵy da bola­shaq­ta naqty sheshimin tabady dep bilemin. Meniń aıtarym, Prezıdent bireý, biz kóppiz. Elbasy ba­ǵyt­tady ma, ony júzege asyrý úshin barlyǵymyz da judy­ryq­taı jumylýymyz kerek. Nur­sul­tan Nazarbaev osynyń bar­lyǵyn da Qazaqstan halqynyń ıgiligi úshin jasap jatsa, biz sol Qazaqstannyń patrıoty bo­lýy­myz kerek. Nıet durys bo­lýy kerek. Taýdaı ister tamasha bastalyp, sońy qalyp qoımasa eken. Prezıdent aıtqan kóp­te­gen máseleler uzaq merzimge esep­telgen. Al onyń nátıjesin 2020 jyly Prezıdentimizben birge kórýge jazsyn deńiz. Áńgimelesken Názıra JÁRIMBETOVA. Qostanaı. -------------------------------- Sýrette: «AgromashHoldıng» AQ jumysshylary men saıası partııa ókilderi Joldaýdy birigip kórdi. Sýretti túsirgen V.VEDENKO.