Qytaıdyń «Shenchjoý-21» mıssııasynyń ekıpajy «Tıangýn» orbıtalyq stansııasyndaǵy shaǵyn jylyjaıda ósirilgen qyzanaqtyń pisken ónimin jınady. Bul týraly Sınhýa agenttigi habarlady, dep jazady Egemen.kz.
Eksperımentke arnalǵan agronomııalyq júıeni Qytaıdyń ǵaryshkerlerdi daıarlaý ortalyǵynyń zertteý toby ázirlegen. Qondyrǵyda arnaıy jasalǵan jaryqdıodty shamdar qoldanylady. Olardyń spektri ósimdiktiń ósýine qolaıly rejımge beıimdelgen. Mundaı sheshim energııa shyǵynyn azaıtyp, jaryqtyń tıimdiligin arttyrýǵa múmkindik beredi.
Sýarý tetigi de ózgeshe. Júıe ósimdiktiń tamyr aımaǵyna sýdy usaq tuman túrinde búrkeıdi. Bul ylǵaldy dál mólsherleýge, sýdy únemdeýge jáne tamyrdyń qajetti ortada turaqty qorektenýine jaǵdaı jasaıdy. Orbıtada sý men qorektik eritindini basqarý kúrdelirek bolǵandyqtan, dál osyndaı tásilder tájirıbe júzinde tekseriledi.
Ǵaryshtyq «jylyjaı» stansııaǵa 2025 jyldyń shildesinde «Tıanchjoý-9» júk kemesi arqyly jetkizilgen. Jobanyń basty maqsaty – mıkrogravıtasııa jaǵdaıynda ósimdikterdi tıimdi ósirýdiń negizgi tehnologııalaryn synaý. Mundaı zertteýler uzaq merzimdi ǵarysh saparlary úshin mańyzdy, óıtkeni ósimdik ósirý ekıpajdy jańa ónimmen qamtamasyz etýge jáne jabyq ortadaǵy tirshilikke qajetti sheshimderdiń bir bóligine aınalýy múmkin.
Ekıpaj kún saıyn ósimdiktiń ósýin baqylap, kórsetkishterdi tirkep otyrǵan. Ǵaryshker Chjan Lý ósimdik kútý jumysy tyǵyz kestede psıhologııalyq serpin beretinin, al jasyl jelekke qaraýdyń erekshe áseri baryn aıtqan. Sondaı-aq onyń pikirinshe, aldaǵy ǵylymı tapsyrmalarǵa kúsh-jiger jınaýǵa da kómektesedi.
Aldaǵy ýaqytta «Tıangýn» stansııasynyń «ǵarysh baǵynda» bıdaı, sábiz jáne dárilik ósimdikterdi agronomdyq ádispen ósirý josparlanyp otyr. Osylaısha, orbıtalyq ortada ósirýge bolatyn daqyl túrlerin kóbeıtý kózdeledi.