Merekege – mereıli jetistiktermen

Qyzmettik boryshyn óteý kezinde qaza bolǵan ishki ister organdary  men ishki ásker qyz­met­­shi­lerine arnap ornatylǵan «Alataý» sport kesheni aldyndaǵy monýmentke Qazaqstan polı­sııasynyń 24 jyldyǵyna oraı gúl shoq­taryn qoıý rásimi bolyp ótti. О́ıtkeni, keshegi kún Elbasy Jarlyǵymen polısııa kúni retinde belgilengendigi halyqqa málim. Osy shara aıasynda IIM-niń oqý oryndary túlek­terine leıtenant pogondary tabys etildi. Al bul mereı­li sharaǵa mınıstrlik pen ortalyq apparat qyzmetiniń basshylary, ardagerler, ishki ister organdary men ishki ásker ardagerleri, oqý oryndarynyń túlekteri men olardyń ata-analary qatysty. Monýmentke gúl shoqtaryn qoıý rásiminen keıin qaza tapqan ishki ister organdary men ishki ásker qyzmetshileriniń rýhyna taǵzym etý úshin bir mınýttyq únsizdik jarııalandy. Arty­nan birneshe dúrkin aspanǵa oq atylyp, is-shara polısııanyń astanalyq garnızonynyń jáne Ulttyq ulannyń merekelik sherýimen jal­ǵasyn tapty. Sondaı-aq, shara aıasynda Ishki ister mı­nıstri Qalmuhanbet Qasymov IIM oqý oryn­dary­nyń túlekterine leıtenant pogondaryn saltanat­ty túrde ózi tabystaǵandyǵyn aıta ketý kerek. Bir top ardagerlerdiń ishinen biz otstavkadaǵy polısııa general-maıory Meıirhan Jamanbaevty sózge tartqan edik. «Merekege búkil qyzmetkerler, ardagerler jáne oqý oryndarynyń túlekteri jınalyp, atap ótýde. Polısııanyń qoǵamdyq tártipti saqtaýda atqaryp jatqan sharýalary kóp. Jaqynda Aqtóbede oryn alǵan oqıǵa kezinde polısııa qyzmetkerleri óziniń jigerliligin, qyzmetine adaldyǵyn kórsetti. Olaı bolsa barlyǵynyń otbasyna baq-bereke, amandyq tilegim keledi», deıdi  Meıirhan Saǵynbekuly. Ardager, bul oraıda, eger polısııa jaqsy jumys isteıtin bolsa, onda elimizde tynyshtyq pen bereke bolatynyn, sonymen qatar elimizde tatýlyqpen ómir súrýge barlyq jaǵdaı bar ekendigin de qaperge sala ketti. Merekelik shara IIM-niń klýbynda saltanatty jınalyspen jalǵasyn tapty. Onda óz ómir­lerin qurban etip, qyzmettik boryshyn adal da minsiz atqarǵan qyzmetkerler árqashan maqtan tuty­latyny erekshe ataldy. О́ıtkeni, erlikpen qurban bolǵan jandar óz abyroılaryn namyspen saq­tap qalyp, búgingi kúni polısııa úshin erlik pen batyl­dyqtyń jarqyn úlgisi retinde ishki ister organ­dary­nyń senimdi dińgegine aınalyp otyr. Minber­ge shyǵyp quttyqtaý sózin jetkizgen Ishki ister mınıstri mundaı quttyqtaýlar jan-jaqtan túsip jat­qandyǵyn erekshe rızashylyqpen jetkizdi. Polı­sııa general-polkovnıgi Qalmuhanbet Qasymov, son­daı-aq, qylmys kórsetkishiniń tómen­dep kele jat­qan­dyǵyn jáne qoǵamdyq tártip­ti saqtaý men tóten­she jaǵdaılardyń aldyn alý baǵytynda da bir­qatar jetistikterdiń oryn alyp otyrǵandyǵyn atady. Ishki ister organ­dary qyzmetkerlerin kási­bı merekesimen qut­tyq­tap, aldaǵy qyzmetterine tabys tiledi. Son­daı-aq, merekelik buıryqqa saı ishki ister organ­daryn­yń birqatar qyzmetkerleri «Quqyq tártibin qamtamasyz etýge qosqan úlesi úshin» medali­men jáne de qurmet gramotalarymen mara­pat­tal­­dy. Budan basqa, birqatar qyzmetkerlerge merzi­­m­i­nen buryn ataqtar berildi. Jalpy Ishki ister mı­nıstriniń buıryǵymen ortalyq appa­rat­tyń jáne aýmaqtyq bólinisterdiń 535 qyzmet­keri qyzmettik mindetterin adal atqarǵany úshin marapattaldy. Asqar TURAPBAIULY, «Egemen Qazaqstan»