Qazaqstanǵa qyzyǵýshylar kóp

47 qazaqstandyq týroperator Qytaı týrısterimen belsendi jumys júrgize bastady Keń baıtaq, ásem de kórikti Qazaqstan jeri týrızmge suranyp-aq tur ǵoı. Biraq, ony shetelderdegi týrıster, onyń ishinde Qytaı da bar, jetkilikti bile bermeıdi. Osyny eskergen Qazaqstan jaǵy ekotýrızm, alpınızm, jaǵajaı, oqý-bilim, densaýlyq, taý shańǵysy jáne dinı týrızm taqyryptary boıynsha tusaýkeser-tanystyrylym ótkizdi. Sonymen birge, EKSPO-2017 halyqaralyq kórmesi týraly da Qytaı halqy osy joly keńirek bile aldy. Sátin salsa, 2017 jyly Qazaqstandaǵy Qytaı týrızmi jyly bolmaq. Osy jaıly da júzdesý barysynda keń pikiralysý boldy. Bul júzdesýge dáneker bolǵan – Qazaqstan Respýblıkasynyń QHR-daǵy elshiligi, Syrtqy ister mınıstrliginiń konsýldyq qyzmet departamenti, Shanhaı qalasyndaǵy Bas konsýldyq, Úrimshi qalasyndaǵy tólqujat-vıza qyzmeti, Qytaıdyń halyqaralyq saýda-sattyqqa yqpal jasaý komıteti, eki eldiń iri týrıstik operatorlary, «Astana EKSPO-2017» UK» AQ ókilderi. О́tken jyldyń sońynda Qazaqstan Respýblıkasy Investısııalar jáne damý mınıstrligi men QHR reforma jáne damý isteri jónindegi memlekettik komıteti arasynda toptyq týrıstik vızalardy berý tártibine baılanysty memorandýmǵa qol qoıylǵan edi. Osynyń jaı-japsary keńinen túsindirildi. Burynǵydaı emes, endi qytaılyq týrısterdiń top bolyp Qazaqstanǵa sapar shegýi jeńildedi. Bul – ADS-vıza túri. Mundaı vıza berý osy jyldyń 1 shildesinen bastalady. Qazaqstan Respýblıkasynyń QHR elshiliginiń keńesshisi Rahymjan Rahımovtyń aıtýyna qaraǵanda, Qazaqstanda týrıs­­tik salalardy damytýdyń 2020 jylǵa deıingi tujyrym­dama­­sy bar. Onda ınfraqurylymdar qurylysy, jańa týrıs­tik oryndardy ashý, halyqaralyq básekelestikke laıyq taýar­lar men qyzmet, ýaqyt talabyna saı týrıstik júıeni qalyp­tas­tyrý jáne tıisti kadrlardy daıarlaý máseleleri qarastyrylǵan. – Atalǵan tujyrymdamanyń nátıjesinde Qazaqstan sheteldik týrısterdi tartý jónindegi 50 eldiń qataryna enýdi nıet etip otyr, – deıdi R.Rahımov. Qazir eki eldiń arasynda aptasyna 34 avıareıs bar. Onyń 18-i – Qazaqstannyń, 14-i Qytaıdyń enshisinde. – Bizdiń kompanııa 1996 jyly quryldy. Qytaıdaǵy «5A» deńgeıinde júzdegen jetekshi kompanııalardyń qataryndamyz. Jyldyq qarajat aınalymy 1 mıllıard ıýan shamasynda. Qytaıdyń 150 qalasynda fılıalymyz bar. Bizdiń eldiń týrızm naryǵy óte úlken – jylyna orta eseppen 120 mıllıon qytaılyq týrıst shet elderge saparǵa shyǵady, – deıdi bizben áńgimesinde «CCITS» kommer­sııalyq týrızm kompanııasynyń prezıdenti Van Peısıan. Onyń aıtýynsha, qytaılyqtar bir ret týrıst retinde bar­ǵ­an orynǵa ekinshi ret qaıtara barmaıdy. Jańa týrıstik oryn izdeıdi. – Qazaqstanda týrısterdi qyzyqtyratyn oryndar jetkilikti eken. Sondyqtan da biz qazaqstandyq týroperatorlarmen tyǵyz yntymaqtasa jumys jasaýǵa yntaly bolyp otyrmyz, – dedi Van Peısıan. Al, «Menchjılıýı» týrıstik kompanııasy bas dırek­torynyń orynbasary Sıýı Sıaomın mynadaı oı aıtty: «Bizdiń kompanııa negizinde ishki týrızm boıynsha jumys isteıdi. Biraq, jaqyn ýaqytta syrtqy naryqqa shyǵýdy da josparlap otyrmyz. Qazaqstan qytaılyq týrıster úshin óte tartymdy baǵyt bolady dep oılaımyz. О́ıtkeni, sizderde óte tamasha tabıǵat bar, qysqy sport túrleri men ekologııalyq týrızm úshin jaǵdaılar jasalǵan. Sondyqtan Qazaqstanǵa qyzyǵýshylyq tanytyp otyrmyz». «Turan – Asia» – qazaqstandyq týroperator. Osy kompa­nııanyń dırektory Gúlǵaısha Qasenhanovanyń aıtýynsha, Qazaqstan qytaılyq týrısterdi qabyldaýǵa daıyn. – 2017 jyl Qazaqstandaǵy Qytaı týrızmi jyly bolyp jarııalandy. Kelesi jyly Astanada EKSPO ótedi. Bizdiń elde kórikti tabıǵat pen tarıhı oryndar óte kóp. Ol týraly qytaılyq týrısterge jan-jaqty aqparat berildi. Olardy qabyldaýǵa bizdiń kompanııa daıyn. Marshrýttar ázir. Qytaı tilin jaqsy meńgergen mamandarymyz bar. Eń basty baǵyt – «Jibek joly» boıyndaǵy qalalar – Almaty, Taraz, Shymkent, Túrkistan bolyp otyr. Biz buǵan deıin Germanııa, Japonııa, Sıngapýr, Gonkong, Malaızııa jáne basqa da elderdiń týrıs­terimen tyǵyz baılanys júrgizip keldik, qytaılyq týrıs­­terdi de qushaq jaıa qarsy alamyz, – dedi G.Qasenhanova. Osy basqosý barysynda ADS kelisimi jóninde tolyq aq­pa­rat berildi. Bul – qytaılyq týrısterdiń top bolyp Qazaq­stanǵa saparlaýy úshin vıza berý kelisimi. Osy tizimge Qazaq­stan jaǵynan 47 kompanııa, Qytaı jaǵynan 380-ge jýyq kom­panııa endi. Qazaqstandyq «Asia Discovery» týrıstik kompanııasy dırektorynyń orynbasary Raýshan Sartaeva osy ADS kelisimi jóninde bylaı degen edi: «Bul óte durys qadam. Endi Qazaqstandy kórsem-bilsem degen týrısterdiń qatary artatyny sózsiz. Bizdiń kompanııa sheteldik týrısterdi tartý jumysymen 2001 jyldan beri aınalysyp keledi. Endi mine, qytaılyq týrıstermen de jumysty bastaımyz. Olardyń ishinde avtotýrızmge qulyq bildirip otyrǵandar kóp. Jibek joly boıymen júrýge yntalary zor. Jalpy, qytaılyqtardyń Qazaqstanǵa qyzyǵýshylyǵy keremet». Sadyq ÁKIJANOV, «Egemen Qazaqstan» – Beıjińnen Qytaı Halyq Respýblıkasy   Sadyq Ákijanov «Egemen Qazaqstan» gazetiniń Qytaı Halyq Respýblıkasyndaǵy menshikti tilshisi bolyp jumysqa kiristi. Ol Pavlodar qalasynda týǵan. 2006 jyly ál-Farabı atyndaǵy Qazaq memlekettik ýnıversıtetiniń jýrnalıstıka fakýltetin bitirgen. Qazaqstan Respýblıkasy Pre­zı­­­dent­­­tik mádenıet ortaly­ǵynda ǵylymı qyz­metker, QR Qorshaǵan ortany qorǵaý mınıstrliginde bas sarapshy, Ekologııa aýdıtorlary­nyń ulttyq pa­la­­ta­synda BAQ-pen baılanys jáne ekonomıka máse­le­leri jónindegi menedjer bolyp qyzmet atqarǵan.