Toqal alǵysy keletinderdiń óz saıty bar
Musylman aǵaıynnyń ekinshi (úshinshi, tórtinshi) áıel alý jolyn jeńildetetin saıt ashylyp, jumys istep jatyr. Musylmany basym bola bastaǵan Ulybrıtanııa jerinde.
Qazirge deıin servıs qyzmetin 35 myńnan astam adam paıdalanyp úlgeripti. Saıttyń negizin qalaýshy 33 jastaǵy Azad Chaıvala ózge konfessııa ókilderine arnalǵan Polygamy.com degen jobany da iske qosypty. Munda 7 myń paıdalanýshy tirkelgen. Ideıa avtoryn Brıtanııada kóp áıel alýdy nasıhattaýdy 7 jyl túrmede otyrýmen jazalaıtyn zańy da toqtatpaǵan.
«О́ldi» degen batyryń ózi kelgen úıine
Qytaıdyń Ma Sısıan esimdi azamaty ózin «jerlep» qoıǵasyn, úsh jyldan keıin úıine kelgen. Aqyl-esi kemdeý jigit budan jeti jyl buryn úshti-kúıli joǵalyp ketken.
2012 jyly sot-medısına sarapshylarynyń aıǵaǵymen ol kólik qaǵyp óltirilgen dep sanalyp, izdeýdegiler tiziminen shyǵarylǵan. Týǵan-týystary sosyn syrtynan janaza shyǵarady. Sóıtse, Ma osy jyldardyń bárinde jergilikti jabyq mekemelerdiń birinde jumys istepti. Eger kenet jumystan shyǵaryp jibermese, áli sonda júre beretin túri bolypty. Qazir jergilikti bılik onyń ornyna kimniń jerlengenin anyqtaý ústinde.
Baqanyń móldiri de bolady eken
Reseıdiń Sverdlov oblysynyń zoologtary Krasnoýralsk qalasy mańynan baqanyń buryn kórip júrgenderden ózgeshe eki túrin tapty.
Olardyń biriniń aıaqtarynda taǵy bir qosymsha saýsaq bolsa, ekinshisinde múldem pıgment joqtyqtan ishki qurylysyna deıin túgel kórinip turatyndaı móldir eken. Oral federaldy ýnıversıteti jaratylystaný ǵylymdary ınstıtýty zoologııa kafedrasynyń meńgerýshisi Vladımır Vershının bul anomalııalyq qubylysqa osyndaǵy burynǵy hımııa kombınatynyń eshqandaı qatysy joq ekenin ashyp aıtty.
Áıeliniń kózine shóp salǵan sottalady
Álemde mundaı da el bar. Buryn Ońtústik Koreıa sondaı edi. О́tken jylǵy aqpanda odan shyqty. Endi onyń ornyn Kamerýn basty.
Qazir el parlamentinde osyǵan sáıkes talqylaý júrýde. «Nekeden tys balalary bar erkekter jazalanýy tıis, óıtkeni, bul onyń áıeline adal bolmaǵanyn aıǵaqtaıdy», – degen túsindirme beredi zań shyǵarýshylar. Al mundaǵy burynnan bar normaǵa sáıkes, nekeden tys jaǵdaıdaǵy qatynasqa barǵan áıelder qazir eki aıdan alty aıǵa deıin túrmege otyrǵyzylyp jatyr.
Japondar mysyq beıneli qaýyn jeýge kiristi
Japonııanyń Hokkaıdo aralyndaǵy Fýrano aımaǵynda keskini keremet qana emes, sonymen qatar, syrtynda Hello Kitty mysyq balasynyń sýreti salynǵan qaýyn ósirý qolǵa alyndy.
Qaýyn pisýge bir aı qalǵanda onyń qabyǵynda sol rásimniń syzyqtary paıda bolady, mezgili jetkeninde ol mysyqqa aınalady. Fermerler sonyń ishinde ádemi bolyp kóringenderin ǵana satýǵa shyǵarady. Al qaýyndardyń báriniń pishimi dóńgelek, salmaǵy 1,8 kg bolýǵa tıis. Olardyń baǵasy 5500 ıen, ıaǵnı 52 dollar turady.
Bir selfı jeti jigitti jer jastandyrdy
Úndistanda jeti stýdent aralaryndaǵy bireýiniń Gang ózenindegi kópir ústinde áserli selfı jasamaq áreketi kezinde sýǵa ketip qaldy.
Oqıǵa Ýttar-Pradesh shtatyndaǵy Kapýr qalasynda oryn alǵan. Segiz jigitten quralǵan top qatty jańbyr jaýyp turǵan kezde ózen jaǵasyna kelgen. Olardyń biri fotoǵa túsý úshin bógettiń ústine kóterilgende, aıaǵy taıyp ketip, ózen arnasyna qulaıdy. Ony qutqarmaq bolyp umtylǵan alty joldasy da aǵystyń qattylyǵynan sýǵa ketedi. Tiri qalǵan jalǵyz jigit sosyn qutqarýshylarǵa telefon shalady...
Úılenbeı jatyp ajyrasyp ketti
Saýd Arabııasynda úılený toıynan soń sanaýly saǵat ótkende alǵan qalyńdyǵynyń áli betin ashyp úlgermegen kúıeý jigittiń onymen ajyrasý týraly aryz jazǵan oqıǵasy tirkeldi.
Toı saltanaty bitken soń jańa qosylǵan jup ózderi aldyn ala daıyndap qoıǵan meımanhana nómirine kelgen, biraq áıeli kúıeýine yqylas bildirý ornyna uıaly telefonymen bolyp ketken. Ol birinshi neke túnine shaqyrǵan kúıeýine sms arqyly «til qatqan». Sóıtse, quttyqtaýshy dostaryna jaýap qaıyryp otyrypty. Sosyn kúıeýiniń: «Saǵan men kerekpin be, dostaryń kerek pe?» degen suraǵyna ol oılanbastan: «Dostarym» dep jaýap beripti.
Aqparat agenttikteriniń materıaldary negizinde daıyndaldy