Qazaqstandyq tuǵyrdan sekirýshiler arasynda eń jasy, «ushqysh shańǵyshy» atanǵan Evgenıı Levkın K-95 tramplıninen sekirýden altyn medaldi jeńip aldy! Otandasymyz saıystyń eki raýndynda úzdik nátıje kórsetti. Sportshy 252 upaı jınady. Ekinshi orynda 248,5 upaı jınaǵan, K-125 tramplıninen sekirý boıynsha Azıada chempıony atanǵan – japondyq Kazýıa Ioshıoka. Úshinshi oryn 244 upaı alǵan kelesi qazaqstandyq sportshynyń enshisinde – Radık Japarov qola júldeger!
Bul 10 jastan beri sportpen aınalysyp júrgen 18 jastaǵy Evgenıı Levkınnniń alǵashqy altyn júldesi. Úlken keleshegi bar jas sportshy saıys kúnderiniń barysynda úzdik nátıjeler kórsetip, japondyqtar altyn alatynyna senimdi bolǵanyna qaramastan, óziniń bas júldege laıyq ekendigin dáleldegen edi. Jarys bitkennen keıin aldymen BAQ ókilderiniń qolpashyna ıe bolǵan Evgenıı jýrnalısterdiń jabyla qoıǵan jalǵyz suraǵyna:
– Qýanyshym qoınyma syımaı tur. Japon Kazýıa Ioshıokany bas qarsylasym dep sanadym. Alaıda, men odan myqty bolyp shyqtym. Azıada chempıony atanǵanyma áli senbeı turmyn. Jeńisimdi ata-anama arnaımyn! – dedi.
Bul kezde Japonııa sportshylary jabyrqaýly bolatyn. Barlyq kezde ustamdy bolyp kelgen Japonııa quramasynyń tuǵyrdan sekirý boıynsha jattyqtyrýshysy Kendjı Sıýda K-95 tramplıninde ótken jarystardan keıin kóńili óte tómen boldy:
– Men Azıadaǵa eń úzdik sportshylardy alyp kelgenmin. Jáne bizder tramplınnen sekirý saıystarynyń barlyq altyndaryn jeńip alatynymyzǵa sengen edik. Bolmady...
Jarys aldynda Halyqaralyq tramplınder keshenin tuman basyp, jańbyr sirkirep turdy. Alaıda, Qazaqstannyń tramplınnen sekirý federasııasy ókilderi jarystardy keıinge qaldyrýdyń qajeti joq, saıys bekitilgen keste boıynsha ótedi, dep málimdegen bolatyn. Shańǵymen tuǵyrdan sekirý boıynsha Azıadanyń jarystar dıreksııasy aýanyń joǵary ylǵaldylyǵy men tuman K-95 tramplıninde jeke sekirýshiler arasynan úzdikterdi tanýǵa kedergi bolmaıdy, dep sendirdi.
Alańdaýly jurtqa Qazaqstan quramasynyń sekirýshisi Konstantın Korolev: «Jyldamdyq alatyn aımaqty jaqsy daıyndap qoıdy. Qar jaqsy nyǵyzdalǵan. Árıne, jańbyr jaýyp turǵan soń keı jerler batpaq. Biraq jarystarǵa ol kedergi keltirmeıdi. Biz saıysty bastaýǵa ázirmiz. Jaqsy kórsetkishterge qol jetkizemiz dep oılaımyz» dep oı bólisken edi. Tramplın qyzmetkerleri:
– Tóreshiler sportshylardy, al sportshylar tramplınniń bar aımaǵyn kórip turady. Sondyqtan jarystar qalypty jumys tártibinde ótedi. Sekirýshiler aýa raıynyń barlyq jaǵdaıyna daıyn, olar anaý-mynaýǵa tańǵalyp, abyrjı qoımaıdy, – dedi.
Halyqaralyq tramplınder kesheni osylaısha aldyn-ala, bir kún buryn K-95 tramplıninen sekirý jarystaryna saqadaı saılana bastaǵan. «Jerge qoný» aımaǵyna mamandar 30 santımetr qoldan jasalǵan qar shashyp úlgerdi (halyqaralyq standart boıynsha qar qalyńdyǵy 25 santımetrden kem bolmaýy tıis). Jyldamdyq alatyn aımaqty qatyryp jatty. Jarystardyń bas tóreshisi Edvard Leýshın aýa temperatýrasy 8 gradýstan kóterilmese, bári oıdaǵydaı bolatynyna sendirip: «Eger aýa raıy kúrt ózgerip jatsa, jarystardy keıinge qaldyrýǵa haqymyz bar. Tipti, saıystardy túnde de ótkize alamyz. Tramplınderge jaryq túsirip turatyn sham kóp. Qatty jaýyn-shashyn bola qalsa, basylǵansha kútemiz. Al jańbyr aqyryn ǵana sirkirep nemese qar azdap qana jaýyp tursa, onda jarysymyzdy bastaı beremiz. Bizdiń basty mindetimiz – tramplınnen sekirýshilerdiń qaýipsizdigin qamtamasyz etý. Tek Halyqaralyq shańǵy sporty federasııasy jarystar ótkizýge kelisim berse, onda tramplın – saıystarǵa saqadaı saı», – degen edi.
Sonymen 4 aqpan Qazaqstan, Japonııa, Koreıa jáne Qytaıdyń tramplınnen sekirý jarystaryna qatysatyn sportshylary úshin saıystyń sońǵy kúni bolatyn.
Myna qyzyqty qarańyz, jattyǵý jarystary kezinde eń jaqsy kórsetkishterdi japon Kazýıoshı Fýnakı men koreı Choı Hıong Chýl kórsetken-di. Bul kezde Iýheı Sasakı japon sekirýshileriniń jeńetinderine senimdi edi. Baıqaý kezindegi alǵashqy eki sekiristiń nátıjesi boıynsha, K-95 tramplıninen eń joǵary kórsetkishke jetken – qazaqstandyq Radık Japarov bolatyn. Nátıjesinde, jerlesimiz qola júldeger atandy.
Aınash ESALI.