Shappaı báıge alatyn komanda

Aspanmen amandasqan aq bas Alataýdyń alaqanynda otyrǵan ataqty Medeý muz aıdyny. Bendı. Muz aıdynynda Qazaqstan-Moń­ǵo­lııa quramalary. Alǵash ret Qysqy Azııa oıyndaryna «sáıgúligin» úki­lep qosqan dopty hokkeıden ja­rysqa úsh qurama ǵana qatysyp ja­tyr. Qyrǵyzstannyń birinshi ret qatysýy. Olar alǵashqy matchynda Mońǵolııa quramasynan 17:2 esebimen utylǵan. Sodan soń álemdegi tórttiktiń ishine kirip júrgen Qa­zaq­­stannyń qolyna tústi. Esep – 21:0. Osy nátıjelerge qarap Qazaq­stan-Mońǵolııa kezdesýinde qaı quramanyń jeńiske jetetindigi beseneden belgili edi. Solaı boldy. Match bastaly­symen jigitterimiz qarsy qaqpaǵa atoı saldy. Qyrǵyzdardy jeńip, sál de bolsa kóńilderi kóterilip qalǵan mońǵoldar bastapqyda eki-úsh shabýyldy toıtarǵa­nymen, qaı­qy taıaqshany qaıqy qylyshtaı ser­meıtin baǵlandarymyzdyń tezine tótep bere almady. Mońǵol­dar­dyń qaqpasynyń tyǵynyn ót­ken­de ǵana qyrǵyzdar qaqpasyna 8 ret at oınatyp kirgen surmergen Raýan Esalıev oıynnyń besinshi mınó­tin­de ashyp berdi. Qandy basyń beri tart dep. Osydan keıin-aq mońǵoldardan degbir ketti. Araǵa eki mınót salyp, sur jebedeı sýy­rylǵan Eskendir Nuǵ­manov gol soq­ty. Taýdan túıilip kelgen tuman aıdyndy basyp qalsa da jigitterimiz qımyldaryn báseńdetpedi. Oıyndy keıinge shegere me degen qaýipti tabıǵattyń ózi seıiltti. Tu­man etegi túrildi. Onynshy mı­nó­tte Raýan taǵy da qaqpany qan­da­dy. 15-mınótte Asqar Temirálıev sýy­ryldy. Sodan soń Raýan men Eskendir atqa qaıta mindi. Kezek-kezek gol soǵa­dy. Oıynnyń 40-shy mınótinde Vladımır Novoshılov­qa kezek zorǵa tıdi. Birinshi kezeń – 9:0. Mońǵol hokkeıshileri esinen tanǵandaı kúı keship, úziliske ketti. Ekinshi kezeńniń 48-shi mınótinde taǵy da Eskendir Nuǵmanov esep ashty. Odan keıin árıne jaı oǵyn­daı jarqyldaǵan Raýan Esalıev. Tek 78-shi mınótte ǵana Arys­tan Qa­zy­baevtyń qaqpa kiltin tapqany bolmasa, bul match Raýan­nyń jeke basymdyǵymen ótti. Raýan bul joly 10 gol soqty. Árıne, koman­dalyq serikteriniń járdemimen. – Budan da kóp gol soǵýǵa múmkindigimiz boldy, – deıdi ol. – Biraq fınaldyq oıynǵa kúsh saq­taýymyz kerek. Mońǵoldar osal dep aıta almaımyn. Tegeýrin bar. Nashar komanda álem chempıo­naty­na qatyspaıdy. Olar aqtyq synda baryn salatyn shyǵar. Baqtııar TAIJAN.