Baıyrǵy Qaztalov aýyly san ulttardyń tatý-tátti mekeni bolyp keldi. Osydan jarty ǵasyr buryn aýdan ortalyǵynda túrli ult ókilderi turdy. Iá, qazirgi kúnde túrli sebeptermen bul ult ókilderiniń paıyzdyq kórsetkishteri tómendegeni shyndyq. Degenmen, qazaq bolyp ketken basqa ulttyń ókilderi baqýatty ómir súrýde. Sonyń biri – Valentına Ývarova apamyz. Qazaqsha sóılep ketkende shúldirlep sóıleıtin shala qazaqtardy orta jolda qaldyratyn apamyzdy aýyl tik turyp qurmetteıdi desek, artyq emes. Tipti, apamyz aýylda ata-anasynan aıyrylǵan qazaq balalaryna ókil ana bolyp, olardy er jetkizgenin de bilemiz. Sol balalar búginde bir-bir shańyraq ıeleri. Valıa apamyzdyń 80 jastyq toıynyń bel ortasynda júrdi. Mine, bul baýyrmaldyq, uly dostyq deýge bolady.
Endigi aıtpaǵymyz, apamyzdyń ul-qyzdary sonaý Reseıdiń ortalyqtarynda turyp jatyr. Biraq olar jyl saıyn ózderiniń kindik qany tamǵan jerge kelip, bir aýnap ketedi. Tek ózderi ǵana kelip qoımaıdy, balalaryn da ertip keledi. Sonyń aıǵaǵyndaı, jaqynda Valıa apanyń Ivanovo qalasynan qyzy Nadejda, Túmen qalasynan kelini Elena ul-qyzdarymen kelip, úlken shańyraqty qýantyp tastady. Al olar shańyraqta ǵana bolyp qoımaı, rýhanı ortalyq – kitaphanaǵa kelýdi de jyl saıyn dástúrge aınaldyrýda. Kitaphananyń balalar bólimine kelip, búldirshinderi Vıktorııa men Denıske qazaq tilindegi kitaptardy oqytyp, tanystyrdy.
«Myna úshinshi synypqa kóshken qyzym Vıktorııa men aǵamnyń uly Denıske jáne jeńgem Elenaǵa bizdiń kindik qanymyz tamǵan týǵan jerdi tanystyrýdy kózdesem, ekinshi jaǵynan, qazaq degen darhan da keńpeıil halyqtyń baı tilin, ádet-ǵurpyn bilgizý taǵy bir maqsatym. О́ıtkeni, joldasym da Qaztalov aýylynda týyp-óskendikten, ekeýmiz qazaq tilin jaqsy bilsek te, balalarymyz budan beıhabar ǵoı.
Kelgennen beri Elena, Denıs, Vıktorııa da qazaqtyń keıbir sózderin úırenip qaldy. Al úıde anamyz Valıa qonaqqa kelgen nemere-jıenderine qazaqsha sózder aıtyp qala beredi. Úırenip qalǵan daǵdy ǵoı» dep Nadejda bir kúlip qoıdy.
Kitaphanada Denıs pen Vıktorııa bar yntalarymen kitaphanashy apalarynan qazaq tilindegi kitaptardy alyp, mazmunyn qyzyǵa surap jatqanyn baıqadyq.
Osyndaı kórinisti kórgende dostyqtyń tini jalǵasa beretinine kózimiz jetti.
Ásem BOLAT
Batys Qazaqstan oblysy,
Qaztalov aýdany