«Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasynyń músheleri Qaraǵandy oblysynyń turǵyndarymen jańa Konstıtýsııanyń negizgi erekshelikterin talqylady. Túrli alańdarda ótken kezdesýlerge zııaly qaýym men etnomádenı birlestikterdiń ókilderi, eńbek ujymdary, kásipkerler men jastar qatysty, dep habarlaıdy Egemen.kz.
Delegasııa quramynda Senat depýtaty Serik О́teshov, Májilis depýtattary Baýyrjan Smaǵulov, Arman Qalyqov, Tilektes Adambekov, Ulttyq kásipkerler palatasy «Atameken» basqarma tóraǵasynyń orynbasary Gúlnar Bıjanova, sondaı-aq oblystyq máslıhat depýtattary men azamattyq qoǵam ókilderi boldy.
Koalısııa músheleri aldymen «Qarmet» AQ-nyń «Tentek» shahtasynyń ujymymen kezdesti. Kómir óndirý salasyndaǵy mańyzdy óndiristik kásiporynda eńbek jáne áleýmettik quqyqtarǵa qatysty ózgerister keńinen túsindirildi. Kezdesýge 400-den astam qyzmetker qatysty.
Jıyn barysynda senator Serik О́teshov jańa Konstıtýsııa jobasynyń tujyrymdamalyq negizderine toqtaldy.
«Jańa Konstıtýsııa azamattardyń quqyǵy men bostandyǵyn nyǵaıtýǵa, memlekettik ınstıtýttardyń jaýapkershiligin arttyrýǵa jáne ádil basqarý júıesin qalyptastyrýǵa baǵyttalǵan. Onyń negizinde adamnyń múddesi basymdyqqa ıe bolýy jáne bıliktiń ashyqtyǵy qaǵıdalary jatyr. Áleýmettik kepildikter men qoǵamdyq baqylaý mehanızmderine de erekshe kóńil bólindi», dedi senator.
Sodan keıin Koalısııa músheleri 300-ge jýyq áleýmettik sala qyzmetkerimen Ata Zań jobasyn talqylady. Ashyq formatta ótken jıynda qatysýshylar óz suraqtaryn qoıyp, oılaryn ortaǵa saldy. Delegasııa ókilderi barlyq saýalǵa naqty jaýap berip, konstıtýsııalyq reformalardyń mán-mańyzyn egjeı-tegjeılitúsindirdi.
Kelesi kezdesý Qaztutynýodaǵy Qaraǵandy ýnıversıtetiniń oqytýshylary jáne stýdentterimen ótti. Jıynǵa 300-ge jýyq adam qatysty. Is-sharada Májilis depýtaty Baýyrjan Smaǵulov jańa Konstıtýsııa jobasynda azamattar men memlekettiń mindetteri arasyndaǵy teńgerim qamtylǵanyna nazar aýdardy. Atap aıtqanda, tarıhı jáne mádenı murany saqtaýǵa qamqorlyq jasaý, tarıh pen mádenıet muralaryn qadirleý syndy Qazaqstan azamattarynyń mindetterin jurtshylyq jyly qabyldady.
«Jańa Konstıtýsııa jobasy memlekettiń saıası júıesin odan ári jańǵyrtýǵa, áleýmettik kepildikterdi nyǵaıtýǵa, kásipkerlikti qoldaýǵa, ǵylymdy, mádenıetti jáne ulttyq qundylyqtardy damytýǵa baǵyttalǵan strategııalyq baǵdarǵa tolyq sáıkes keledi. Usynylyp otyrǵan ózgerister azamattardyń ál-aýqatyn arttyrýǵa baǵdarlanǵan memlekettik ınstıtýttardyń neǵurlym turaqty ári tıimdi modelin qalyptastyrady», dedi halyq qalaýlysy.
Budan keıin koalısııa músheleri bıýdjettik sala qyzmetkerleri: dárigerler, pedagogtar jáne áleýmettik sala mamandarymen júzdesti. Onyń barysynda qatysýshylarǵa jańa Konstıtýsııanyń negizgi normalary túsindirilip, adam quqyǵy men bostandyǵyn nyǵaıtý, memlekettik organdar jumysynyń ashyqtyǵy jáne bılik ınstıtýttarynyń áleýmettik jaýapkershiligin kúsheıtý baǵyttary aıtyldy.
Osakarov aýdanynyń Mádenıet úıinde uıymdastyrylǵan is-sharaǵa jańa qujattaǵy ózgeristerdi jan-jaqty talqylaýǵa 200-ge jýyq aýyl sharýashylyǵy taýaryn óndirýshilerijınaldy. Olar zańdylyq, memlekettiń áleýmettik jaýapkershiligi qaǵıdattaryn nyǵaıtý jáne azamattardyń sheshim qabyldaý prosesine qatysýyn keńeıtý boıynsha suraqtaryn qoıyp, pikirlerin bildirdi.
Nura kentinde dıalog kópsalaly kolledj ujymy men aýdandyq medısına qyzmetkerlerimen jalǵasty. Is-sharada bıýdjet salasy qyzmetkerleriniń áleýmettik qorǵalýyn keńeıtý, sheshim qabyldaý prosesiniń ashyqtyǵyn arttyrý jáne azamattardyń qoǵamdyq-saıası ómirdegi rólin kúsheıtý máseleleri qaraldy. Sondaı-aq «Qaratal» KMP ujymymen kezdesý ótti. Onyń barysynda eńbek jáne áleýmettik kepildikter, halyqtyń reformalardy júzege asyrý úderisine qatysý tetikteri túsindirildi.
«Eńbek ujymdarymen túsindirý jumystary azamattardy jańa konstıtýsııalyq erejeler týraly habardar etip qana qoımaı, reformalardy iske asyrý kezinde olardyń naqty qajettilikteri men usynystaryn eskerýge múmkindik beredi. Ashyq dıalog qoǵam men memleket arasyndaǵy senimdi nyǵaıtady», dedi Májilis depýtaty Tilektes Adambekov.
Budan keıin koalısııa ókilderi Saran qalasynda birqatar ónerkásiptik kásiporynnyń ujymymen kezdesý ótkizdi. Atap aıtqanda, «TEMPO KAZAHSTAN» JShS, «Silk Road Electronics» JShS jáne «QazTehna» JShS qyzmetkerlerimen mazmundy dıalog uıymdastyryldy. Sonymen qatar Koalısııa músheleri shaǵyn jáne orta bıznes ókilderimen kezdesti. Onda azamattardyń referendýmǵa qatysýy, ashyq kommýnıkasııa jáne qoǵamnyń anyq aqparat alýynyń memleket bolashaǵyn qalyptastyrýdaǵy róli talqylandy.
Qazaqstanda jańa Konstıtýsııanyń jobasy jarııalandy
Eske sala keteıik, «Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasy 12 aqpanda quryldy. Onyń quramyna 5 saıası partııa men shamamen 300-ge tarta qoǵamdyq uıym kirdi. Olar shamamen 5 mıllıon qazaqstandyqty biriktiredi.
Jańa Konstıtýsııa saıası júıeni qalaı ózgertedi?