«Astana» «Seltıkpen» oıynda jeńisti qoldan berdi (foto, vıdeo)

Foto: Erlan Omarov

Astanadaǵy «Astana-Arena Qajymuqan» sport kesheninde Eýropa chempıondar lıgasy úshinshi irikteý raýndynyń birinshi matchy oınaldy. Onda jergilikti «Astana» men Shotlandııanyń «Seltık» komandalary 1:1 esebimen teń tústi.

27 shilde, sársenbi. Astana.  «Astana-Arena Qajymuqan» sport kesheni. «Astana» (Astana, Qazaqstan) - «Seltık» (Glazgo, Shotlandııa) 1:1 Tóreshiler: Paolo Sılvıo Massolenı, Djanlýka Karolato, Djakomo Paganessı (bári - Italııa)  «Astana»: Nenad Erıch, Marın Anıchıch, Nemanıa Maksımovıch, Azat Nurǵalıev (Serikjan Mujyqov 62), Igor Shıtov, Abzal Beısebekov (Agım Ibraımı 85), Patrık Tvýması, Iýrıı Logvınenko, Jýnıor Kabananga, Dmıtrıı Shomko, Roher Kanıas. Bas jattyqtyrýshy: Stanımır Stoılov. «Seltık»: Kreıg Gordon, Efe Embroýz, Skott Braýn, Lı Grıffıts, Mýssa Dembele (Nır Bıtton 62), Stıýart Armstrong (Djeıms Forrest 72), Mıkael Lýstıg, Patrık Roberts, Efan O’Konnell, Kalým Makgregor (Tomas Rogıch 77), Kıran Tırnı. Bas jattyqtyrýshy: Brendan Rodjers. Goldar: Iýrıı Logvınenko 19, Lı Grıffıts 78. Eskertýler: Azat Nurǵalıev 28, Agım Ibraımı 90+6 -  Lı Grıffıts 76, Skott Braýn 90+6. Qaqpaǵa soqqy: 13 - 5; Qaqpa aýqymyna soqqy: 8 - 1; Buryshtama: 8 - 2; Dopty ıemdený: 47 % - 53 %.

Kezdesý eki jaqtyń bir-birlerine barlaý jasaýlary arqyly aqyryn qarqynmen bastaldy. Biraq osy tusta qonaqtardyń alǵashqy múmkindik týǵan sátten alǵa umtylýǵa daıyn ekenderi de baıqalyp qaldy. Sol nıetpen olar birtindep oıyn tizginin óz qoldaryna ala bastaǵandaı bolyp edi, alaıda, kóp uzamaı astanalyqtar kezdesýdiń mundaı aýanmen órbýine ózderiniń kelise qoımaıtyndyqtaryn tez bildirip, qarsy shabýylǵa shyǵa bastady. Osy qarqyn birte-birte alań ıeleriniń basymdylyqtaryn qamtamasyz etip, olar alań ústinde jan-jaqty ústemdik qurýǵa kóshti. Osydan bastap olardyń qarsy qaptalǵa jasaǵan árbir shabýyly qaýipti bola tústi. Sol joryqtardyń pátinde meımandar aıyp alańy ishinde Jýnıor Kabananga ádemi múmkindikti paıdalana almady. Al qaýipti dopty shotlandtardyń qorǵaýshysy qaqpa syrtyna qaraı teýip jiberip, jaǵdaıdy durystady. Osy úshin Patrık Tvýması bergen buryshtama dobyn Iýrıı Logvınenko basymen uryp, qaqpaǵa kirgizip, tordy bir serpiltip tastady. Astanalyqtar budan keıin de esepti ulǵaıtýdyń birneshe múmkindigin paıdalana almady. Máselen, aıyp alańy ishinde qaqpashymen qarama-qarsy kelgen Azat Nurǵalıevtiń urǵan dobyn golkıper Kreıg Gordon áreń qaıyryp, buryshtamaǵa qaraı jiberdi. Munyń sońynan bizdiń jerlesterimiz taǵy birneshe ret buryshtama berý quqyǵyna ıe boldy. Biraq solardyń basym kópshiliginde Tvýması dopty dál aldyńǵydaı etip qaqpa alańyna qaraı jetkizip bere almaı, olar qonaqtar qorǵaýshylarynyń ońaı oljalaryna aınalyp ketip jatty. Ekinshi taımnyń bas jaǵynda astanalyqtar basym kóringenimen, qonaqtar oınaı kele, birazdan keıin alańdaǵy jaǵdaıdy teńestire aldy. Sol mezetterde olar batyl shabýylǵa da shyǵa bastady. Solardyń bir sátinde glazgolyqtar 78-mınýtta jaýap dop soǵyp, tarazy basyn teńestirip te ketti. Aldymen bizdiń qaqpa alańyna sol qaptaldan kirgen Patrık Roberts tórt birdeı oıynshymyzdy aldap ótip, dopty artqa, alań ortasyna qaraı jóneltti. Oǵan jurttyń bárinen buryn jetken Lı Grıffıts toqtatpastan qaqpaǵa qaraı tepti. О́ziniń sol búıiri jaǵynan zý ete qalǵan sol dopqa Nenad Erıch tosqaýyl qoıa almady Gol! Esep osylaı teńesti. Budan keıin «Astana» jaıdaq atqa qonyp, taǵy biraz qarsylastar alańyna qaraı jóńkile umtyldy. Sol mezetterde birneshe ret alǵa shyǵýdyń múmkindikteri boldy. Biraq bizdiń fýtbolshylar odan tıimdi nátıje shyǵara almady. Matchtyń sońǵy sekýndtarynda Marın Anıchıch dál sondaı keremet múmkindikti bosqa jiberip qoıdy. Endi «Astana» men «Seltık» arasyndaǵy qarymta match 3 tamyz kúni Glazgonyń «Seltık Park» stadıonynda ótedi. «Astanaǵa» kelesi kezeńge ótý úshin qalaıda jeńiske jetý nemese 2:2 jáne odan da iri eseptermen teń oınaý kerek. Al oıyn taǵy da 1:1 bolyp aıaqtalsa, onda negizgi matchtan keıingi ekstra-taımǵa kezek beriledi. Munda da jeńimpaz anyqtalmasa, penaltıler serııasy belgilenedi. Osy juptyń jeńimpazy Chempıondar lıgasynyń toptyq kezeńine ótý jolynda kúresetin bolady. Utylǵan komanda Eýropa lıgasynda jarys jolyn jalǵastyrady. Damır QOJAMQUL https://youtu.be/nrU04TTcaYA