Qazaqstan Táýelsizdiginiń 25 jyldyǵy men halyqaralyq EKSPO-2017 kórmesi qarsańynda uıymdastyrylǵan festıvaldiń «Jeltaýdyń jelmaıasy» atanýy eleń etkizgen. Jelmaıany halqymyzǵa jaıly qonys izdegen Asan qaıǵy babamyzben baılanystyramyz. Danyshpannyń jelip júrip kóz jetkizgeni – qazaq dalasynyń barlyq pushpaǵy jumaq ekendigi. Jeltaýdy Abylaıdy han kótergen Qanaı bı Quttymbetuly tańdaǵan eken. Al Abylaıdyń aq túıesi han joryqtarynyń sáttilik sımvoly retinde qasterlenedi. Keıinirek Jeltaýdy jaǵalaı Qanaı bıdiń alty aýyly qonys tepken. Búgingi tanymdyq shara bı urpaǵy Keńes Odaǵynyń Batyry, akademık Málik Ǵabdýlllınniń aýyly Qoısalǵanda ótýde.
Oblystyq mádenıet basqarmasynyń qoldaýymen Málik Ǵabdýllın mýzeıi uıymdastyrǵan tarıhı etno-mádenı festıval qazaq halqynyń turmys-tirshiligi men salt-dástúrin molynan qamtyǵan aýqymdy shara boldy.
Jańbyrly jaz ǵoı. Alystan munartyp kósh-kerýen kórindi. Merekesi men berekesi shalqyǵan kóńildi kósh. Aýa raıynyń kez kelgen ýaqytyndaǵy kóshpeli ómirge daǵdylanǵan topty Qoısalǵan aýyly qýanyshpen qarsy aldy. Arnaıy kıiz úı tigilip, irgesine jelmaıa shóktirildi. Ánshi Aslan Muhamedııardyń oryndaýyndaǵy Qudaıberli Myrzabektiń qazaq kóshin keıiptegen áni jurtshylyqty tolqytyp jiberdi.
El dýmanyna jınalǵan qalyń kópshilikti Zerendi aýdanynyń ákimi Asqar Muratuly, oblystyq ishki saıaat jáne mádenıet basqarmalarynyń basshylary Aına Mysrálimova men Sáýle Bóribaeva, qoǵam qaıratkeri Amankeldi Sadyrbekov, Qazaqstannyń kınologtar federasııasynyń prezıdenti Oralbek Kaısanov, ulttyq sport túrlerinen memlekettik bapker Ramazan Satybaev, Kókshetaýdaǵy M.Ǵabdýllın mýzeıiniń dırektory, aqyn Qudaıberli Myrzabekov quttyqtady.
Budan soń Qurmanǵazynyń «Kóńilashar» kúıi oınalyp, kórermen aldynan Memlekettik Týymyzdy kóterip, aqboz at mingen M.Ǵabdýllın beınesindegi ofıser sońyna eki sarbazyn ertip shaýyp ótti. Elimizdiń Ánurany qalyqtap, Kók baıraǵy jelbiregende rýhtanyp, arqalanbaǵan adam qalmady. Endi bir sát kópshiliktiń nazary toıdyń bastalǵanyn habarlap, at ústinde dombyrasyn dúbirletken jarshy Sársenbaı Hasenovke aýdy. «Bazaryń tarqamasyn, ardaqty elim» dep alqaly toptyń aldynda Ábdisalyq Salyq ketti áýeletip.
Festıval aıasynda kıiz úıler, ulttyq taǵamdar, qymyzmuryndyq, ónertapqyshtar, ulttyq qolónershiler baıqaýlary men tabaq tartý, saǵyz qaınatý sııaqty ulttyq dástúrimizden kórinister uıymdastyryldy. Oblystyq ulttyq sport mektebi shákirtteriniń qatysýymen qaýym aldynda aýdaryspaq, kókpar, jamby atý, teńge ilý, qyz qýý sııaqty ulttyq oıyndar oınalyp, tazy men tóbet sııaqty qazaqtyń tekti ıtteriniń kórmesi de qyzyqtyrdy.
Alty aýyl júırikterin ortaǵa shyǵaryp, ózara baq synasqan báıgede Qoısalǵan aýylynyń turǵyny Almas Bashırovtyń aty birinshi kelse, Saryózek ókili Ádil Sálimjan ekinshi oryndy ıelendi. Úshinshi oryndy Darhan Zınatolovtyń júırigi aldy. Budan soń ortaǵa balýandar shyǵyp, boz kilem ústinde beldesti. Qazaq kúresinen úshinshi oryndy Sáken Seıfýllın aýylynyń balýany Rasýl Júsipálın ıelenip, ekinshi oryn Birlestik aýylynyń turǵyny Qaıyrjan Saǵyndyqovqa buıyrdy. Birinshi oryndy Igilik aýylynyń balýany Nurlybek Qabdolov jeńip aldy. Al Qanaı aýylynyń turǵyny Abylaı Baıadilov «Jeltaýdyń jelmaıasynyń» túıe balýany atandy.
Jıyn barysynda aqyndar aıtysy, dástúrli ánshiler baıqaýy ótkizilip, oblystyq analar uıymynyń múshesi Raýza Báıkenova Gúlshat Joldyońǵar esimdi náresteni besikke bóledi. Sondaı-aq, bes náresteniń tusaýy kesilip, jaqynda súndettelgen Danıal Sársenbaevqa básire taıy mingizildi.
Dalalyq kórme alańynda «Kazakhstan Innovations» qoǵamdyq qorynyń tóraıymy Márııam Ábisheva ınnnovasııalyq joba tanystyrylymyn ótkizse, jergilikti qolóner sheberleri Kenjebaı Smaǵulqyzy, Rýstam Iаkovlev, Ermuhamed Qazıhanov óz qolymen daıyndaǵan ulttyq buıymdardy kópshilik nazaryna usyndy.
Baqbergen AMALBEK,
«Egemen Qazaqstan»
Aqmola oblysy,
Zerendi aýdany
Sýretterdi túsirgen
Ermurat DOSYMOV