Parlament Májilisiniń depýtaty, Májilistegi «Nur Otan» partııasy fraksııasynyń múshesi Pavel Kazansev О́skemen qalasyndaǵy «Nurly Jol» baǵdarlamasy boıynsha salynǵan qurylys nysandarymen tanysty.
Depýtat jumys saparyn oblys ortalyǵynda jańadan boı kóterip jatqan kópqabatty turǵyn úı keshenin kórýden bastady. Atalǵan ǵımarat negizinen «Qoljetimdi baspana-2020» baǵdarlamasy boıynsha salynyp jatyr. Kóppáterli úıdiń jalpy quny 661,902 mıllıon teńgeni quraıdy. Qazirgi tańda qurylystyń 90 paıyzy aıaqtalǵan. Merdiger mekemeniń bas ınjeneri Ismaıl Alıevtiń aıtýynsha, jumys tártibi kestege sáıkes oryndalyp keledi. «Búgingi kúni bir aýysymmen jumys atqarsaq, kelesi aptada nysandy belgilengen ýaqytynda paıdalanýǵa berý maqsatynda úsh aýysymmen jumys isteıtin bolamyz», – dedi ol.
Jospar boıynsha, nysan tamyz aıynyń ortasynda tapsyrylýy tıis. P.Kazansev «Qazaqstan jıhaz jáne aǵash óńdeý óndiris kásiporyndarynyń qaýymdastyǵy» ókilderimen de kezdesý ótkizdi. Basqosý barysynda Májilis depýtaty «100 naqty qadam» Ult Jospary, Elbasynyń halyqqa Joldaýy jáne «Máńgilik El» ulttyq ıdeıasynda berilgen baǵyttar boıynsha áńgimelep, kóterilgen máselelerdi baqylaýyna alatyndyǵyn aıtty.
Dýman ANASh,
«Egemen Qazaqstan»
О́SKEMEN