Qazaqstan elektrondy úkimetti damytý jóninen Azııa memleketteriniń arasynda 7-orynǵa shyqty. Bul týraly BUU-nyń elektrondy úkimetterdiń damý deńgeıi týraly esebinde aıtylǵan. Bizdiń aldymyzda ázirge Ońtústik Koreıa, Sıngapýr, Japonııa, Izraıl, Bahreın jáne Birikken Arab Ámirlikteri tur.
Al osy elektrondy úkimetti damytýǵa qatysty jahandyq reıtıngte Qazaqstan TMD elderiniń barlyǵyn basyp ozyp, 33-orynǵa ilikken. Bul oraıdaǵy kósh tizginin Ulybrıtanııa bastasa, odan keıingi oryndarda Avstralııa men Ońtústik Koreıa ornyqqan. Jahandyq reıtıngte AQSh 12-orynda, Reseı 35- orynda, Qytaı 63-orynda, О́zbekstan men Qyrǵyzstan 80 jáne 97-oryndarǵa jaıǵasqan.
BUU elektrondy úkimetterdiń damý ındeksi (EGDI) – memleketterdiń aqparattyq jáne kommýnıkasııalyq tehnologııalar arqyly azamattarǵa memlekettik qyzmetter kórsetý áleýetin jáne osy qyzmetterdi kórsetýge degen ázirlik deńgeıin baǵalaıtyn keshendi kórsetkish. Osyndaı mańyzdy kórsetkishte Qazaqstannyń kompozıttik ındeksi bıyl 0,7250 ball bolsa, jahandyq ortasha EGDI baly 0,4922 deńgeıine jetken. Bul ındeks adam kapıtalynyń damýy, telekommýnıkasııalyq ınfraqurylym jáne onlaın qyzmetter sııaqty 3 kórsetkishten quralady. Reıtıng pen oǵan qatysty kórsetkishterdi ár eki jyl saıyn BUU sarapshylary eseptep, nátıjesin jarııalap otyrady.
«Egemen-aqparat»