Radıkalızm, ekstremızm jáne terrorızmge qarsy turý – Qazaqstan Prezıdenti N.Á.Nazarbaevtyń «Qazaqstan-2050» Strategııasy: qalyptasqan memlekettiń jańa saıası baǵyty» atty Qazaqstan halqyna Joldaýynda aıtylǵan basym baǵyttaǵy mindetterdiń biri.
Jasyratyny joq, búgingi kúnniń tolǵaqty degen máselesi – teris aǵymnyń jeteginde ketken jastardyń bulyńǵyr bolashaǵy. «Batpandap kirgen mysqaldap shyǵady» degen bar. Munyń zardabyn biz qazirdiń ózinde tarta bastadyq. Jaǵdaı osylaısha kúrdeli bolyp qalyptasqanda Qaraǵandy oblysynda jastar arasyndaǵy dinı ekstremızmniń aldyn alý boıynsha jumystardy kúsheıtý qolǵa alyna bastady. Mundaı múbárak sharýada jastar isimen aınalysatyn basqarmaǵa oblystyq ortalyq meshit kómek qolyn sozbaqshy. Bul týrasynda arnaıy uıymdastyrylǵan brıfıng barysynda oblystyq jastar saıasaty máseleleri jónindegi basqarma basshysy Mıras Quttybaı málimdedi.
Brıfıngte dinı ekstremızmniń aldyn alý jumystaryn kúsheıtý maqsatynda Qaraǵandy oblysynyń jastar saıasaty máseleleri jónindegi basqarma men QMDB-niń Qaraǵandy oblystyq ortalyq meshitiniń jastar isi jónindegi bólimi arasynda ózara yntymaqtastyq jónindegi memorandýmǵa qol qoıyldy.
Bul memorandým jastarymyzdyń sanasynda bizdiń halyqqa tán dástúrli dinı nanymdy jáne radıkaldy ıdeologııaǵa qarsy ımmýnıtetti qalyptastyrýǵa baǵyttalǵan keshendi sharalardy jetildirýdi maqsat etedi.
Budan bólek atalǵan memorandým jastar arasyndaǵy dinı qatynastar salasynda saraptamalyq jáne áleýmettik zertteýler júrgizýdi qarastyrady. Belgili bir dinı ustanymy bar «zamanaýı jas adamnyń portretin» jasaý da josparda bar. Sonymen qatar, jastarmen jumys isteıtin kóshbasshylar men mamandarǵa arnalǵan arnaıy kýrstar uıymdastyrylmaqshy. Al aqparattar taratý úshin áleýmettik jelilerge arqa súıeý kerektigi aıtyldy.
«Jastardyń áleýmettik jáne materıaldyq turǵydan qorǵalmaýy, baǵalaý men paıymdaýda maksımalızmge uryný, psıhologııalyq shıkilik, bóten pikirge táýeldi bolý – osy aıtylǵan birneshe sebepterdiń ózi-aq radıkaldy jáne búldirgi ıdeıalardyń ońaı taraýyna múmkindik beredi dep aıtýǵa bolady», – dedi Mıras Quttybaı.
Qaırat ÁBILDINOV,
«Egemen Qazaqstan»
QARAǴANDY