Keshe Qazaqstannyń «Gvardeısk» polıgonynda «Artıllerııalyq oq atý sheberleri» – «Túngi sprınt» baıqaýynyń ekinshi kezeńi bastaldy. Armııa oıyndary sheńberinde bul túngi ýaqytta ótkizilgen alǵashqy saıys.
Tartys kúrdeli boldy. Jaýyngerlik qalypta túngi kórý prıborlarymen júrgizý, mınaatqyshtan, granataatqysh pen avtomattan nysanalarǵa dóp tıgizý – munyń barlyǵyn Qazaqstan, Reseı, Qytaı, Qyrǵyzstan jáne Venesýelanyń atqyshtaryna alǵash ret túngi mezgildegi baıqaýda oryndaýǵa týra keldi.
Áskerı qyzmetshiler 2B11 mınaatqyshynan, túngi kózdeýishteri bar RPG-7V jáne AK-74-ten oq atty. Mınaatqyshtan oq atý radıýsy 15 metr jeke quramǵa arnalǵan tasalary bar arnaıy daıyndalǵan ordan júrgizildi. Mejege dóp tıgizý úshin árbir komandaǵa úsh mınadan berildi. Árbir múlt ketken oqqa bir aıyp sheńberi qosylyp otyrdy. Oq atýlar nysanany úzdiksiz jaryqtandyrý úshin belgilengen qarqynmen «Ońtústik» óńirlik qolbasshylyǵynyń 85395 áskerı bóliminiń D-30 122 mm gaýbısalarynyń atys eseptoptarymen júrgizildi.
Túngi jaǵdaıda oq atý úshin qatysýshylarǵa qazaqstandyq «Aselsan» óndirisiniń túngi kórý kózdeýishteri usynyldy. Optıka mergenderge túngi ýaqytta oq atýǵa, sonymen qatar, saıystyń keıbir sátteriniń túsirilimin júrgizýge múmkindik berdi. Bıylǵy jyly oıyndar Qazaqstan Respýblıkasy Qorǵanys mınıstrliginiń resmı saıty arqyly alǵash ret tikeleı efırde kórsetilgeni de erekshe boldy.
Qazaqstannyń mınaatqysh eseptoptary túngi jaǵdaıda barlyq kedergilerdi oıdaǵydaı eńserip, barynsha jyldamdyqta máre syzyǵyna jetti. Baıqaýdyń ekinshi kezeńiniń qorytyndysy boıynsha Qazaqstannyń komandasy úzdik atandy. Ekinshi orynǵa Reseı turaqtady, úshinshi oryndy Qyrǵyzstannyń komandasy enshilese, tórtinshi oryndy Venesýela mise tutty.
Qazaqstannyń komandasy jetkilikti deńgeıde daıyndalǵanyn aıta ketken jón. Baıqaýdyń basynan bastap qazaqstandyq artıllerııashylar joǵary nátıjeler kórsetip, barlyq synaqtarda ózderin senimdi ustaýda.
«Egemen-aqparat»
Sýretterdi túsirgender
Aqádil Rysmahan,
Altynbek Qartabaı