Astanada quqyq buzýshylyqtar men qylmystardyń aldyn alý maqsatynda buryn sottalǵan jáne esepte turǵan azamattarmen kezdesý ótti. Onda isti bolǵan adamdar bos jumys oryndarymen tanysty.
– Sharaǵa esepte turǵan, buryn sottalǵan, shartty túrde merziminen erte bosatylǵan 150-ge jýyq azamat shaqyryldy. Olarmen qoǵamdyq tártip salasynda da, otbasylyq turmysta da qylmystar men quqyq buzýshylyqty boldyrmaý boıynsha profılaktıkalyq suhbat júrgizildi. Adamdar jazasyn ótep bolǵan soń, jumysqa tura almaı, kimge júginetinin bilmeıdi. Buryn isti bolǵan adamdy eshkim jumysqa almaıdy, alǵysy da kelmeıdi. О́mirde kez kelgen adam qatelesedi. Biz olarǵa beıimdelýge kómektesý úshin osyndaı sharalar uıymdastyramyz. Endi olar jumysqa ornalassa júrgizýshi, naýbaıshy bolyp isteıdi, – deıdi Almaty aýdandyq IIB jergilikti polısııa qyzmeti basshysynyń orynbasary, polısııa podpolkovnıgi Arman Aıtybekov.
Kezdesýde Astana qalasynyń jumyspen qamtý ortalyǵynyń mamandary jazasyn ótep, bostandyqqa shyqqan adamdarǵa bos jumys oryndaryn usyndy.
Buryn sottalǵandarǵa áleýmettik beıimdelýge kómektesý úshin sharaǵa «Beıimdeý tehnologııalary men tujyrymdamalary» qoǵamdyq qorynyń ókilderi shaqyryldy. Qor zańgerleri esepte turǵan azamattarǵa quqyqtyq kómek kórsetti.
Dastan KENJALIN,
«Egemen Qazaqstan»