Taılandqa sapar tabysty ótti

Elordamyzda Halyqaralyq maman­dan­dyrylǵan kórme ótkizý kúni jaqyndaǵan saıyn osy bir jahandyq sharaǵa baılanysty kelissózder de keńeıe túsýde. Ústimizdegi jyldyń 8-9 tamyzy kúnderinde «EKSPO-2017»-niń Komıssary Rápil Joshybaev Taıland Koroldiginde bolyp, birqatar kezdesýler ótkizdi. Sapar barysynda, Rápil Joshybaev Taıland energetıka mınıstrliginiń turaqty hatshysy – EKSPO-2017 kórmesindegi Taı­land seksııasynyń Ult­tyq komıssary Areepong Bho­ochaoommen, BUU Bas hatshy­synyń orynbasary – ESKATO-nyń atqarýshy hatshysy Shamshad Ahtarmen, Taıland eliniń isker toptarymen jáne eldiń jetekshi BAQ ókilderimen kezdesti. Energetıka mınıstrliginde ót­ken kezdesý barysynda eki el ara­syndaǵy ekonomıkalyq jáne energetıkalyq yntymaqtastyq jáne Taılandtyń Astanadaǵy EKSPO-2017 kórmesine qatysý máseleleri tilge tıek etildi. Rápil Joshybaev óz sózinde kórmege halyqaralyq qatysýshylardy tartý jáne elordadaǵy kórmeni ótkizýge daıyndyq sharalary boıynsha atqarylyp  jatqan ju­mys­tarǵa toqtaldy. О́z keze­ginde, Taılandtyń Ulttyq komıs­sary A.Bhoochaoom óz eli­niń EKSPO-2017 kórmesine qaty­sa­tyndyǵyn taǵy da qýattap, kórmege «jasyl» energetıka salasynda at­qarylǵan jetistikterdiń jetki­zi­letindigin aıtty. Taı­land eli 2021 jylǵa deıin bala­maly energııa kózderi arqyly alynatyn energetıka úlesin 25 paıyzǵa jetkizýdi belgilep otyr. Bul el balamaly energetıka kózi retinde bıomassalardy paı­dalanýda baı tájirıbe jınaq­tap, bıomassalardy energııa kózi­ne aınaldyrý boıynsha Azııa – Tynyq muhıty aımaǵynda kóshbasshylyqqa qol jetkizdi. Taraptar sonymen birge, Qazaqstan jáne Taıland elderi arasynda dıplomatııalyq qatynastyń ornatylýyna 25 jyl bolatyn jyly ekijaqty yntymaqtastyqta jańa serpindi qadamdarǵa qol jetkiziletin­digin atap kórsetti. Osy rette, EKSPO-2017 kórmesi sheńberinde ótkiziletin Ulttyq kúnge oraı­las Taıland koroldik ot­ba­sy músheleriniń Astanaǵa ar­naıy saparyn uıymdastyrý múm­kin­dikteri de qarastyryldy. Kelissóz qorytyndysy bo­ıyn­sha, taraptar Komıssar A.Bhoochaoomnyń ústimizdegi jylǵy 19 tamyzda Taılandtyń EKSPO-2017 kórmesine qatysýy jónindegi shartqa qol qoıý úshin Astana qalasyna saparyn uıym­das­tyrý týraly kelisimge qol jetkizdi. Taıland elordada ótetin EKSPO-2017 kórmesine qatysýyn resmı túrde bekitken 96-shy memleket bolyp tabyldy. Taıland eliniń kórmedegi pavılonynyń jalpy kólemi 734 sharshy metrdi quraıdy. Koroldik sońǵy jyldary ótkizilip kele jatqan EKSPO kórmesiniń barlyǵyna qatysyp keledi. Atap aıtqanda, Taıland Koroldigi Gannover-2000, Aıchı-2005, Saragosa-2008, Shanhaı-2010, Iosý-2012, Mılan-2015 halyq­aralyq kórmeleriniń belsendi qatysýshysy bolyp tabylady. BUU-nyń Azııa jáne Tynyq muhıty úshin Ekonomıkalyq jáne áleýmettik komıssııasy­nyń atqarýshy hatshysy Shamshad Ahtarmen bolǵan kezdesýde ESKATO-nyń kórmege qatysý máseleleri jáne «jasyl» ekono­mı­ka salasyndaǵy yntymaqtastyq máseleleri talqylandy. Ahtar hanym kórme aıasynda ESKATO-nyń arnaıy saıd-ıventin uıymdastyrýdy usyndy. Osy saıd arqyly Azııa – Tynyq muhıty energetıkalyq portalyn tanystyryp turaqty energetıka jáne jasyl energetıkany damytý jóninde onlaın-trenıngter ótkizý máselesin tilge tıek etti. Atqarýshy hatshy BUU Bas Assambleıasynyń 70-shi sessııasy barysynda Qazaqstan Respýblıkasynyń Prezıdenti Nursultan Nazarbaev usynǵan «Jasyl tehnologııa jáne ınvestısııalyq jobalardy»  damytý boıynsha EKSPO bazasynda BUU halyqaralyq ortalyǵyn qurý jónindegi bastamanyń mańyzdylyǵyn erekshe atap kórsetti. Kezdesý qorytyndysynda, ESKATO uıymy Astanada osyndaı ortalyqty qurýǵa jan-jaqty qoldaý kórsetýge daıyn ekendikterine senim bildirdi. Sapar barysynda ótken kezdesýlerde taılandtyq energetıkalyq jáne týrıstik kompanııalar, bıznes toptarynyń ókilderi Astanada ótetin EKSPO-2017 kórmesine erekshe qyzyǵýshylyq tanytty. Taılandtyq týr-operatorlarmen yntymaqtastyq baılanysty damyta otyryp, jergilikti týrısterdi kórmege keńinen tartý máseleleri qarastyryldy. Sapar qorytyndysy boıynsha EKSPO-2017 Komıssary Koroldiktiń «Bangkok Post», «Radio Thailand» jáne «TNN-24» atty jetekshi BAQ-taryna suhbat berdi. «Egemen-aqparat»