Keshe Ortalyq kommýnıkasııalar qyzmetinde Qarjy mınıstrligi Memlekettik kirister komıtetiniń tóraǵasy Dáýlet Erǵojınniń qatysýymen brıfıng ótti. Osy jıynda aıtylǵandaı, elimizdegi úkimettik emes uıymdardy shetelden qarjylandyrýǵa baılanysty eseptilik kúsheıtilmek.
Úkimettik emes uıymdar shetelderden alynǵan qarjy men onyń kádege jaratylýy týraly bir toqsanda bir márte esep berýge tıis. Eger qarajat bir toqsan ishinde jaratylsa, kelesi toqsanda málimet berilmeıdi. Zań júzinde qarjylaı kómektiń kólemine shekteý qoıylmaq emes, tek oǵan tıisti málimetter ýaqtyly berilse bolǵany.
Komıtet tóraǵasy atap ótkendeı, bul aıtylǵan máseleler shetelden beriletin túsimderge monıtorıng jasaý úshin qolǵa alynyp otyr eken. Onyń kásipkerlik salaǵa qatysy joq, bızneske qosymsha eshqandaı salmaq salynbaıdy.
D.Erǵojın osy jıynda memlekettik organdardyń strategııalyq málimetter bazasyna on-laın qol jetkizýge, salyq tóleýshilerdiń jumysyn jeńildetý maqsatynda olarǵa bir jerden qyzmet kórsetýdi uıymdastyrýǵa kóńil bólinetinin aıtty. Bul oraıda, «Azamattarǵa arnalǵan úkimet» memlekettik korporasııasyna úlken mindet júktelip otyr. Atalmysh korporasııa halyqqa qyzmet kórsetý ortalyqtaryn biryńǵaı júıege biriktirýge muryndyq bolýǵa tıis.
– Bıznes pen halyqqa kórsetiletin qyzmetterdiń sapasy jaqsarýy kerek. Salyq pen keden qyzmetindegi biriktirýler osy salada týyndaǵan máselelerdi sheshýdegi alǵashqy qadam deýge bolady. Komıtet salyq pen keden júıelerin ıntegrasııalaýǵa múddeli. Bizdiń barlyq jumystarymyz klıentterge sapaly qyzmet kórsetýge, bızneske qolaıly jaǵdaı jasaýǵa baǵyttalǵan. Al salyq pen keden júıelerin biriktirý qyzmetterdiń sapasyn arttyrýǵa múmkindik beredi, – deıdi Dáýlet Erǵojın.
О́tken jyly elimiz Dúnıejúzilik saýda uıymyna múshe bolǵany belgili. Komıtet tóraǵasy atap ótkendeı, DSU ımporttaýshy elderge taýarlardy keden bajdarynyń tómendetilgen mólsheri boıynsha ákelýge jol ashady. Iаǵnı, ishki naryqqa ákelinetin taýarlardyń arzandaýyna múmkindik týmaq.
Búginde Memlekettik kirister komıteti «Atameken» Ulttyq kásipkerler palatasymen birlesip, daǵdarys kezinde kásipkerlerge qoldaý kórsetý, ákimshilik rásimderdi odan ári jetildirý máselelerin qolǵa alýda. Komıtet tóraǵasynyń aıtýynsha, bul másele bıznes pen memlekettik organdar ózara tıimdi jumys isteýi kezinde ǵana sheshim tappaq. Bıznes salyqty ýaqytynda ári tolyq tólegen saıyn memlekettik organ da ony resimdeý sharalaryn jeńildete berýdi kózdep otyr. Dáýlet Erǵojınniń aıtýynsha, mundaı qadamdar qazirdiń ózinde jemis berip, kóleńkeli ekonomıkanyń úlesi birshama azaıyp kele jatyr.
Arnur ASQAROV,
«Egemen Qazaqstan»