Zaýyttan sonaý 1935 jyly shyqqan Mercedes-Benz 500K Special Roadster-1935 avtokóligi aýksıon arqyly satylmaq. Bul kóliktiń kolleksııalyq qundylyǵyn aıtpaǵanda, tarıhynyń ózi jurtshylyqtyń qyzyǵýshylyǵyn týdyryp otyr.
«Rodster» dep qysqartylyp aıtylatyn kólikti Gans Prım degen nemis 1935 jyly satyp alǵan. Ekinshi dúnıejúzilik soǵys kezinde ıesi tutqynǵa alynady. Sóıtip, soǵys aıaqtalar tusta bar bolǵany 500 danamen shyqqan, kózdiń jaýyn alatyn qymbat kólikti amerıkalyq soldattar AQSh-qa alyp ketipti.
2011 jyly gollandııalyq kolleksıoner Frans van Hare kólikti 3,7 mıllıon dollarǵa satyp alyp, Eýropaǵa qaıta ákeledi. Van Hare qymbatqa alǵan kóligin jurtqa kórsetpek bolyp, Germanııada ótetin klassıkalyq mashınalardyń kórmesine aparypty. Sóıtse, jergilikti polıseıler onyń menshiginiń zańdylyǵyna kúmán keltirip, kólikti tárkileıdi.
Bul oqıǵanyń sońy úlken daýǵa aınalyp, aqyr sońynda sot «Rodsterdi» 70 jyl buryn AQSh-qa zańsyz áketken degen sheshim shyǵardy. Sóıtip, arada talaı jyl ótkende, jumyr jerdiń jartysyn sharlap shyqqan kólik kezinde zaýyttan satyp alǵan Gans Prımniń búgingi urpaqtaryna berildi.
Endi qojaıyndary 70 jyldan keıin qaıtaryp alǵan kólikti aýksıon arqyly satyp, shamamen 7 mıllıon eýro paıda kórýdi josparlap otyr.
Arnur ASQAROV,
«Egemen Qazaqstan»