Parlament Májilisiniń Tóraǵasy Nurlan Nyǵmatýlın Túrkııanyń Qazaqstandaǵy Tótenshe jáne ókiletti elshisi Nevzat Ýıanykpen alǵashqy resmı kezdesý ótkizip, Qazaqstan-Túrkııa yntymaqtastyǵynyń ózekti máselelerin talqylady, dep habarlady osy palatanyń baspasóz qyzmeti.
Taraptar eki memleket basshylarynyń memlekettik saparlary men kezdesýleriniń arqasynda ekijaqty qarym-qatynastyń jyl saıyn joǵary deńgeıde damyp kele jatqanyna toqtaldy.
Qazaqstan Prezıdenti Nursultan Nazarbaev Túrkııada iske aspaı qalǵan áskerı tóńkeris jasaý áreketinen keıin alǵashqy bolyp Ankaraǵa resmı saparmen bardy. Nevzat Ýıanyk óz kezeginde bul sapardy Túrkııa halqy men Úkimetiniń óte joǵary baǵalaǵanyn, sonymen qatar, bul sapar álem aldynda Qazaqstannyń qoldaýyn aıǵaqtaı otyryp, naǵyz dostyq pen baýyrlastyqty dáleldegenin aıtty. Májilis Spıkeriniń aıtýynsha Túrkııa halqy osy kezeńde óz basshylaryn qoldaý arqyly demokratııalyqtyń joǵary úlgisin kórsetip, aýyr synaqtan laıyqty ótti.
Sonymen qatar, Májilis Tóraǵasy elshige jáne búkil túrki halqyna jantúrshigerlik lańkestik oqıǵadan keıingi qaıǵyly jaǵdaıǵa baılanysty kóńil aıtý bildirdi. «Qazaqstan lańkestik árekettiń kez kelgen túrin qatań aıyptaıdy jáne oǵan qarsy batyl kúres júrgize otyryp, osy baǵytta halyqaralyq qoǵamdastyqpen belsendi is-qımyl jasaıdy», dedi N.Nyǵmatýlın.
N.Nyǵmatýlın Qazaqstan Prezıdentiniń Reseı men Túrkııa ustanymdaryn jaqyndastyrýdaǵy mańyzdy ári syndarly rólin alǵa tartyp, Qazaqstan árqashanda Túrkııanyń strategııalyq senimdi seriktesi ári dosy bolyp qalatynyn atap kórsetti.
О́z kezeginde elshi Nursultan Nazarbaevtyń kóregen ári salıqaly saıasatynyń nátıjesinde Qazaqstannyń 25 jyldyq mereıtoıǵa qarqyndy damý tabysymen kelgendigi barsha túrkııalyqty tánti etetinin alǵa tartty.
Parlamentaralyq baılanys máselesin de nazardan tys qaldyrmaǵan kezdesý ıeleri eki el depýtattarynyń yntymaqtastyq jónindegi toptar men halyqaralyq parlamenttik uıymdar arqyly birlese belsendi jumys atqarýǵa daıyn ekendikterin jetkizdi.