Qazaqstan azamattarynyń mobıldik bazasynda 2 mıllıon paıdalanýshy tirkelgen.
Aqparat jáne kommýnıkasııalar mınıstrliginiń qyzmetterdi avtomattandyrý basqarmasynyń basshysy Áset Ýaısovtiń túsindirýi boıynsha, osy bazaǵa qatysý Mobıldi úkimettiń usynatyn barlyq qolaılyǵy men fýnksııalaryn paıdalaný múmkindigin beredi. Bul Mobıldi úkimet, atap aıtqanda, eGov-tyń mobıldi qosymshasy bolyp tabylady.
Egov.kz elektrondy úkimet portaly nemese «Azamattarǵa arnalǵan úkimet» memlekettik korporasııasynyń bólimderi arqyly árbir qalaýshy Mobıldi úkimettiń paıdalanýshysy bola alady jáne mobıldik bazaǵa tirkele alady. Ol úshin portalda avtorlandyrýdan ótý, óziniń telefon nómirin, qupııa sózin kórsetý jáne elektrondy sıfrly qoltańba (ESQ) kómegimen tirkeýdi rastaý jetkilikti.
Búgingi kúni kez kelgen ýaqytta smartfon nemese planshet arqyly qosymsha paıdalanýshylaryna 80 túrli qyzmet pen servıs qoljetimdi. Onyń ishinde, mysaly, meken-jaı anyqtamasyn alý, balabaqshaǵa balany kezekke qoıý, salyqtardy, aıyppuldardy tóleý jáne t.b. bar.
Al mobıldi jeke kabınetke keletin bolsaq, ol jerge azamat týraly barlyq negizgi aqparat túrli memlekettik organdardyń derekter qorlarynan avtomatty túrde tartylyp jınaqtalady. Mysaly, paıdalanýshy óz jeke kabınetinde jeke kýálik nemese tehbaıqaýdyń qoldaný merziminiń aıaqtalýy jaıly jáne de JQE buzǵany úshin aıyppuldar men boryshkerlerdiń tizilimine engizilýi týraly habarlandyrýlardy alady. Sonymen qatar bul aqparat SMS-habarlamalary men push arnalary arqyly da keledi.
«Mysaly, siz jol qozǵalysy erejesin buzǵanyńyz úshin aıyppul týraly smartfonǵa habarlamany alǵanda ony birden eGov qosymshasy arqyly tóleı alasyz. Bul shyn máninde óte yńǵaıly», deıdi Ýaısov myrza.
Qazirgi tańda, Qazaqstanda Mobıldi úkimet arqyly 4,5 mıllıonǵa jýyq qyzmet kórsetilgen bolsa, eGov qosymshasy 365 myńnan astam ret júkteldi.