Reseıdiń Sheshenstan respýblıkasynyń astanasy – Groznyı qalasynda bolǵan surapyl daýyl 122 úıge zalalyn tıgizip, júzdegen aǵashty qulatyp ketti.
Burshaq aralasqan nóser jaýymen birge kóterilgen daýyl respýblıkada senbi kúnniń keshinde soqty. Osyǵan baılanysty Groznyı qalasynda júzdegen aǵash, jarnama qalqandary jerge qulap, elektr qýatyn beretin symdar úzildi. Sonyń saldarynan respýblıka ortalyǵynyń keı jerlerinde elektr jaryǵy toqtap qaldy, birqatar joldar men kóshelerdi topan sý basty. Toǵyz áleýmettik jáne bes ınfraqurylymdyq nysan búlinshilikke ushyrady.
Daýyldyń kezinde 21 jastaǵy qyz qaza tapty. Ol aǵashtar qulap jatqanda mashınanyń ishinde otyrǵan eken. Solardyń biri kólikti basyp qalǵan. Budan bólek, qurylys qurylǵylary ústine qulaýynan bir adam jaraqat alǵan.
Respýblıkada jeksenbi kúni taǵy da burshaq aralas nóser jaýyn quıyp, irkilmeli jel turdy.
Búgin Nadterechnyı aýdany men Groznyı qalasynda tótenshe jaǵdaı, al Ýrýs-Martan aýdanynda joǵary daıyndyq rejimi jarııalandy.
Murat AITQOJA