Oral óńirinde Konstıtýsııa kúnine arnalǵan is-sharalar san alýandyǵymen jáne máni men mazmunynyń tereńdigimen erekshelendi. Solardyń arasynda «Konstıtýsııa – memlekettiń negizgi zańy: ótkeni, búgini men bolashaǵy» atty konferensııanyń shoqtyǵy bıik boldy. Osy basqosýda sóz alǵan Batys Qazaqstan oblysynyń ákimi Altaı Kólginov óz oıyn: Táýelsizdik jyldarynda elimiz ben barsha Qazaqstan halqy tek bir ǵana zań ústemdigine basymdyq beretin memleket pen azamattyq qoǵam qurýǵa kiristi. Osy oraıda Ata Zańymyzdyń alatyn orny aıryqsha. Onyń basty qaǵıdalary men baptary qoǵamdyq ómirimizdiń barlyq salalaryndaǵy iske basshylyq bolyp tabylady dep túıindedi.
Qasterli qujattyń arǵy astary men alatyn ornyn saralap bergen dóńgelek ústel Memlekettik qyzmet isteri mınıstrligi Batys Qazaqstan oblysy boıynsha departamentinde de uıymdastyryldy. Bıylǵy Konstıtýsııa kúni Qazaqstan basshysy Nursultan Nazarbaevtyń Jarlyǵyna sáıkes budan 25 jyl buryn Semeı atom polıgony jabylýymen tuspa-tus keldi. Soǵan sáıkes oblys ortalyǵynda «Aq oramal» atty respýblıkalyq aksııa aıasynda uıymdastyrylǵan sharaǵa bes myńnan astam áıelder qatysty.
– Aq oramal – ar-ojdan men aıbynnyń nyshany. Bul ózara túsinistik pen kelisimge shaqyra bilýdiń taptyrmas joly. Halqymyzdyń arǵy-bergi tarıhynda ortaǵa tastalǵan aq oramaldy eshkim attap ótpegeni belgili. Aq oramal – halqymyzdyń aınymas salt-dástúrleri qatarynan oryn alatyn kıeli qundylyqtardyń biri. Búgingi aksııanyń «aq oramal» ataýyn ıelengeni osy qundylyqtyń bási men mártebesi búgingi kúni arta túspese, kemimegenin kórsetedi, – dedi myńdaǵan áıelder jınalǵan Jaıyq jaǵalaýyndaǵy basqosýda qazaqtyń belgili aqyn qyzy Aqushtap Baqtygereeva.
Temir QUSAIYN,
«Egemen Qazaqstan»
ORAL