El erteńin aıqyndaıtyn jańa Konstıtýsııa jobasyna daýys berý – árbir azamattyń eldik mindeti. Jalpyǵa ortaq iske jumylǵandar ishinde elimizdiń kók baıraǵyn álemge áıgilep júrgen sportshylar men óner maıtalmandary da bar. Olar óz salasynda ǵana emes, saıası arenada da kópten oza shaýyp, 15 naýryzda ótetin respýblıkalyq referendýmnyń mańyzy týraly oılarymen bólisti, dep habarlaıdy Egemen.kz.
Kıkboksıngten álem chempıony Erlan Shaǵban jelige jarııalaǵan jazbasynda sportta árbir sát jarys taǵdyryn sheshetini sekildi, elimiz úshin de taǵdyrsheshti kezeń kelgenin aıtty.
«Biz úshin kıkboksıngte ár sát taǵdyr sheshedi. Bir ǵana soqqy, bir ǵana ádis jekpe-jek jeńimpazyn anyqtap beredi. Sol sekildi qazir bizdiń elimiz úshin taǵdyrsheshti kezeń kele jatyr. Ata zańymyzdyń basym bóligine ózgerister engeli tur. О́mirde jáne sportta árbir sekýnd mańyzdy. Biz sharshy alańǵa shyqqanda tek kúshimizge emes, naqty jospar men durys sheshimge senemiz. Bir sát keshigý men bosańsý jeńiliske ákelýi múmkin. Otanymyzdyń taǵdyry da rıngtegi aıqas sııaqty. Munda syrttan baqylap turýǵa bolmaıdy. Konstıtýsııalyq referendým bizdiń ortaq bolashaǵymyz úshin jasalatyn eń mańyzdy qadam. 15 naýryzda elimizdiń bolashaǵyna atsalysýǵa halyq bolyp jumylaıyq. Bizdiń jarqyn kúnderimiz óz qolymyzda», dep jazdy álem chempıony.
Qazaqstanda avtobýstar jańa Konstıtýsııa jobasy týraly aqparat taratý alańyna aınaldy
Aýyr atletıkadan álem chempıony Nurǵısa Ádiletuly áleýmettik jelide otandastaryn jarqyn bolashaq úshin daýys berýge shaqyrdy.
«15 naýryzda elimiz úshin saıası mańyzdy oqıǵa – respýblıkalyq referendým ótedi. Referendým bul tek daýys berý ǵana emes, bul – azamattyq jaýapkershilik pen el taǵdyryna beıjaı qaramaý. Bolashaq úshin bizdiń daýysymyz mańyzdy. Jarqyn bolashaq úshin daýys berýge shaqyramyn», dep jazdy ol.
Belgili mánerlep syrǵanaýshy, el chempıony Aıza Mambekova jeńis tek muz ústinde ǵana emes, ortaq qundylyqtardy saqtap, bolashaqty birge qura bilýde ekenin jetkizdi.
«Jańa Konstıtýsııa» – jańa serpin, jańa jaýapkershilik. Muz aıdynynda ár qozǵalys tártipke, senimge jáne ishki tártipke negizdeledi. Sol sııaqty, memleket te myzǵymas qaǵıdattarǵa negizdelýge tıis. Sportshy retinde men ant beremin, al azamat retinde elimniń birligi men egemendigin qurmetteımin», dep sózin túıindedi sportshy.
ERG kenshileri jańa Konstıtýsııa jobasyn qoldady
Bıiktikke sekirýden Sýrdlımpıada rekordyn jańartyp, jeńimpaz atanǵan jeńil atlet Faına Meırmanova jańa Konstıtýsııany qabyldaý elimiz úshin mańyzdy kún ekenin aıtty.
«Sportta jetistik kezdeısoq kelmeıdi. Nátıjege jetý úshin tártip pen jaýapkershilik kerek. Bul kúndelikti ómirge de qatysty. Ásirese zańdar men eldiń bolashaǵy týraly áńgime qozǵalǵanda bul aıtylǵandardyń mańyzy budan da arta túsedi. Osy oraıda 15 naýryzda respýblıkalyq referendým ótedi. Bul elimiz úshin asa mańyzdy kún. Sondyqtan men oǵan qatysamyn», dedi ol halyqqa arnaǵan beınejazbasynda.
Sport dúldúlderinen óner ıeleri de qalysyp jatqan joq. Áıgili sazger, ánshi Altynbek Qorazbaev 130 adamnan quralǵan Konstıtýsııalyq komıssııa ázirlegen jańa Ata zań jobasyn qoldaıtynyn, óıtkeni ol jerde eli men jerin súıetin, Otanymyzdyń bolashaǵyna alańdaıtyn azamattar bolǵanyna senetinin jetkizdi.
«Konstıtýsııalyq reforma Memleket basshysy Qasym-Jomart Toqaevtyń birpalataly Parlament qurý jónindegi bastamasynyń negizinde týyndady. Prezıdent bul ıdeıany 2025 jylǵy 8 qyrkúıekte óziniń halyqqa arnaǵan jyl saıynǵy Joldaýynda eldiń saıası júıesin keshendi jańǵyrtý jáne jasandy ıntellekt dáýirinde Qazaqstannyń áleýmettik-ekonomıkalyq damýyna eleýli oń serpin berý maqsatynda aıtqan bolatyn. Men saıasatker emespin, biraq Ata zańymyzǵa 84 paıyz ózgeris enýi – úlken jańalyq dep oılaımyn. Prezıdentimizdiń usynysymen engizilip jatqan osy ózgeristerdi shyn júrekten qoldaımyn. Jańa Konstıtýsııa elimizdiń ári qaraı damýyna, Ádiletti Qazaqstandy qurýǵa kómegin tıgizedi dep senemin», dedi óner salasynyń maıtalmany.
Jańa Konstıtýsııa jobasynda advokatýra mártebesiniń bekitilýi qandaı mańyzǵa ıe?
Belgili estrada juldyzy Mádına Sádýaqasova Ata zańymyzdyń mazmuny jańaryp, el bolashaǵynyń berik quqyqtyq irgetasy qalanyp jatqanyn tilge tıek etti.
«Qazaqstan Respýblıkasynyń jańa Konstıtýsııasynyń jobasy jarııalandy. Qoldanystaǵy baptardyń basym bóligine túzetý engizý qajettiligi jańa redaksııa qabyldaýdy zańdy etti. Sonyń nátıjesinde Konstıtýsııanyń mazmuny jańaryp, el bolashaǵyna berik quqyqtyq negiz qalanyp jatyr. Qazirgi kúrdeli kezeńde ishki turaqtylyqty saqtap, júıeli reformalardy júzege asyrý – memlekettiń basty jetistigi!», dep jazdy ánshi.
Elimizdiń eńbek sińirgen qaıratkeri, teatr jáne kıno aktıory Jalǵas Tolǵanaı referendým ár azamattyń daýysy estiletin sát ekenin aıtyp, ár sózin dáleldi ýájben tuzdyqtady.
«Ár tańdaý – bolashaqqa salynǵan qadam. Ár daýys – el taǵdyryna qosylǵan úles. Jańa Konstıtýsııa adam quqyǵyn qorǵaýdy kúsheıtedi, ádiletti qoǵam qurýǵa jol ashady, bılik pen halyq arasyndaǵy jaýapkershilikti nyǵaıtady», dedi óner maıtalmany.