Jarylǵysh zat Batys Qazaqstan oblysy Aqjaıyq aýdany Ilbishin eldi mekeninen tabyldy. Jergilikti turǵyndardyń biri úıine sý ótkizbekshi bolyp, qazý jumystaryn júrgizip jatqan kezde jer astynan Azamat soǵysynan qalǵan snarıad shyqty.
Málimetterge sáıkes, snarıadtyń uzyndyǵy – 32 sm, dıametri – 76 mm. Qazirgi sátte arnaıy mamandardyń qatysýymen, qaýipsizdik sharalary qoldanyla otyryp, joıyldy.
Batys Qazaqstan oblysy aýmaǵynda Uly Otan jáne Azamat soǵysy kezinen qalǵan birneshe snarıad tabylǵan bolatyn.
Osy jyldyń mamyr aıynyń sońyna taman Jánibek aýdanynyń turǵyndary Uly Otan soǵysynan qalǵan jarylǵysh zat taýyp aldy. Jyra eldi mekenine kanal sýyn jiberetin arnasyna jóndeý jumysyn júrgizip jatqanda, əýe bombasyna uqsas zat qazyp alyndy. Onyń salmaǵy shamamen 50 kılo, uzyndyǵy – 89 santımetr, dıametri – 15 santımetr.
Jənibek aýdanynan 2008 jyly da əýe bombasy tabylyp, ony Aqtóbe qalasynan shaqyrylǵan arnaıy mamandar zalalsyzdandyrǵan bolatyn.
Aıan ÁBDÝÁLI