"Memleket basshysy Qytaıdyń Hanchjoý qalasynda G20 sammıtine qatysty" dep habarlaıdy akorda.kz
Jınalǵandarǵa arnaǵan sózinde Nursultan Nazarbaev G20 sammıtiniń úmitke toly kúrdeli kezeńde ótip otyrǵanyn aıtqan.
– Álemdik ekonomıkanyń, saýda men kapıtal qozǵalysynyń ósý qarqyny baıaýlap keledi. Ol mıllıondaǵan adamnyń ál-aýqatyna áser etedi. Dúnıejúzilik saýda uıymynyń róli tómendeýine jáne álemdik ekonomıkanyń fragmenttelýine alyp keletin transqurylyqtyq jańa saýda-ınvestısııa birlestikteri qurylýda. Bul úderister jahandyq ekonomıkadaǵy yqpal aımaǵy úshin kúrestiń jańa kezeńiniń basy bolýy múmkin, – dedi Qazaqstan Prezıdenti.
Elbasy jahandyq damýdyń budan arǵy joly negizinen búkil dúnıejúzilik qoǵamdastyqtyń is-qımylynyń júıeliligine baılanysty ekenin aıtty.
Osyǵan baılanysty, Nursultan Nazarbaev ekonomıkany jáne qarjyny halyqaralyq turǵydan retteýdegi basty róldi birtutas jahandyq uıym atqarýy tıis degen pikir bildirdi.
– Ondaı qurylymdy Birikken Ulttar Uıymynyń Ekonomıkalyq jáne áleýmettik keńesin Jahandyq damý keńesine aınaldyrý arqyly qalyptastyrýǵa bolady. Oǵan Jahandyq ekonomıkalyq retteýshi fýnksııalary júktelýi kerek, – dedi Qazaqstan Prezıdenti.
Memleket basshysy qazirgi ýaqytta monetarlyq, fıskaldyq saıasatty úılestirý men qurylymdyq reformalar júrgizýdiń mańyzdylyǵyn, alaıda uzaq merzimdi turaqtylyqty qamtamasyz etý úshin bul da jetkiliksiz ekenin aıtty.
– Damýshy elderdi qosa alǵanda, búkil álemde aıyrbas baǵamyn turaqtandyrýǵa qatysty neǵurlym tıimdi usynystar ázirleý qajet, – dedi Nursultan Nazarbaev.
Elbasy álemdik ekonomıkany jandandyrýǵa baǵyttalǵan shara retinde jańa ındýstrııalyq revolıýsııaǵa, sandyq ekonomıka men ınnovasııaǵa senim artýdy usyndy.
– Men bul ustanymdy tolyq qoldaımyn. Ol mindetti tek qana ınklıýzıvtilik prınsıpteri arqyly iske asyra alamyz. G20 men damýshy memleketter arasyndaǵy dıalog ortalyǵyn anyqtap alý kerek. Máselen, Qazaqstanda qurylǵan jáne barlyq qatysýshylar úshin ashyq G-Global aqparattyq-kommýnıkatıvtik alańyn bir nusqa retinde qarastyrýdy usynamyn. Ol 140 memlekettiń 30 myńnan astam sarapshysynyń basyn qosyp otyr, – dedi Memleket basshysy.
Budan bólek, Nursultan Nazarbaev BUU-nyń ornyqty damý maqsattary men Parıj kelisiminiń jáne «jasyl ekonomıka» qaǵıdattarynyń iske asýyna Qazaqstannyń belsendi qoldaý kórsetip otyrǵanyn atap ótti.
– 2017 jyly Astanada «Bolashaqtyń energııasy» taqyrybymen ótkiziletin «EKSPO» halyqaralyq kórmesi osyǵan qyzmet etetin bolady. Sonymen qatar, biz «Astana» halyqaralyq qarjy ortalyǵyn quryp jatyrmyz. Barlyq memleketterdi Astanadaǵy «EKSPO-2017» kórmesine qatysýǵa shaqyramyn. Onda BUU-nyń qoldaýymen tıisti is-sharalar ótkizýge bolar edi, – dedi Qazaqstan Prezıdenti.
Sońynda Memleket basshysy Qazaqstannyń osy zamandaǵy meılinshe ózekti problemalardy sheshý joldaryna qatysty oılaryn «Álem. HHI ǵasyr» manıfesi arqyly jetkizgenin, sondaı-aq manıfest ıdeıalaryn iske asyrý men ıadrolyq jáne jappaı qyryp-joıýǵa arnalǵan ózge de qarý túrlerinen azat álem qalyptastyrý bastamasy uıym tarapynan qoldaý tabady dep úmittenetinin aıtty.
– Terrorızmdi tolyq jeńý úshin G20-nyń barlyq músheleri men basqa da múddeli elderdiń birlese kúsh jumyldyrýy jaqsy bastama bolar edi. Búkil álem qoǵamdastyǵy osyny kútedi, – dedi Nursultan Nazarbaev.