Eýroodaq basshysymen kezdesý
Memleket basshysy sonymen qatar Eýropalyq komıssııanyń tóraǵasy Jan-Klod Iýnkermen kezdesti
Kezdesý barysynda Qazaqstan men Eýropalyq odaq arasyndaǵy saıası jáne saýda-ekonomıkalyq baılanysty nyǵaıtý perspektıvalary qarastyryldy.
Taraptar elimiz ben EO arasyndaǵy keńeıtilgen seriktestik pen yntymaqtastyq týraly kelisimniń mańyzdylyǵyn atap ótip, qarym-qatynastyń odan ári qarqyndy damı beretinine senim bildirdi.
Kanada úkimetiniń basshysymen kezdesý
Qazaqstan Prezıdenti G20 sammıti aıasynda Kanadanyń Premer-Mınıstri Djastın Trıýdomen kezdesti. Kezdesý barysynda Qazaqstan men Kanada arasyndaǵy yntymaqtastyqtyń saýda-ekonomıkalyq, ınvestısııalyq jáne mádenı-gýmanıtarlyq salalar tárizdi basty baǵyttaryna qatysty pikir almasyldy.
Budan bólek, halyqaralyq damýdyń kóptegen máseleleri boıynsha ustanymnyń ortaqtyǵy, sondaı-aq túrli salalarda, sonyń ishinde aýyl sharýashylyǵy salasynda ekijaqty ózara is-qımyldy nyǵaıtý úshin zor áleýet bar ekeni aıtyldy.
Kezdesý sońynda Nursultan Nazarbaev D.Trıýdony Astanaǵa saparmen kelýge shaqyrdy.
Ulybrıtanııanyń jańa premerimen kezdesti
Memleket basshysy sonymen qatar Ulybrıtanııa Premer-Mınıstri Tereza Meımen kezdesti.
Nursultan Nazarbaev pen Tereza Meı elder arasyndaǵy ekijaqty ózara qarym-qatynas máselelerin talqylady, sondaı-aq halyqaralyq kún tártibindegi ózekti máselelerdi qarastyrdy.
Memleket basshysy N.Nazarbaev D.Kemeronnyń Premer-Mınıstr bolǵan kezinde ózara is-qımyl men yntymaqtastyqtyń joǵary deńgeıine qol jetkizilgenin atap ótip, T.Meıdi elimizge saparmen kelýge shaqyrdy.
Rejep Taııp Erdoǵanmen kezdesý
Nursultan Nazarbaev G20 sammıti aıasynda Túrkııa Respýblıkasynyń Prezıdenti Rejep Taııp Erdoǵanmen kezdesti. Kezdesý barysynda ekijaqty yntymaqtastyqtyń keń aýqymdy máseleleri qarastyryldy. Taraptar óńirlik jáne halyqaralyq kún tártibindegi birqatar ózekti máseleler, sonyń ishinde Taıaý Shyǵys pen Ortalyq Azııadaǵy jaǵdaı jóninde de pikir almasty.
Atap aıtqanda, Memleket basshysy jahandyq terrorızmmen jáne ekstremızmmen kúreste halyqaralyq qoǵamdastyqtyń kúshin jumyldyryp, is-qımyldy naqty úılestirý qajettigin atap ótti.