«Qazaqparat» halyqaralyq aqparat agenttiginiń aldynda turǵan negizgi mindet – elimizdiń eń basty aqparat saıty dárejesine saı bolý. Bul týraly búgin Ortalyq kommýnıkasııalar qyzmetinde ótken baspasóz-máslıhatynda «QazAqparat» halyqaralyq aqparat agenttiginiń bas dırektory Ásel Tólegenova málimdedi.
«Eger orta eseppen alatyn bolsaq, «QazAqparat» saıtyna táýligine 27 myń adam kirip, ondaǵy aqparattardy oqıdy eken. Al aldaǵy ýaqytta biz bul kórestkishti 45 myńǵa deıin jetkizýdi kózdep otyrmyz. Ol úshin eń aldymen, bizdiń kontentimiz túbirimen jańalanady. Árıne, burynǵydaı memlekettik baǵdarlamalar men memlekettik organdardyń qyzmeti týraly aqparattar turaqty túrde berilip turady. Biraq odan bólek, biz qarapaıym ınternet paıdalanýshy oqyrmannyń talap-tilegine jaýap beretin, sol arqyly olardy qyzyqtyratyn, oılarynan shyǵatyn dúnıelerdi jarııalaýdy nazarda ustaıtyn bolamyz», dedi Ásel Dýlatqyzy. Onyń aıtýynsha, aldaǵy ýaqytta agenttik saıtynda jarııalanatyn aqparattardy berýdiń qalyby da ózgermek. «Habarlardyń taqyryptary oınaqy, al mazmuny oqyrmandarǵa jeńil qabyldanatyndaı stılde jazylady. Buǵan qosa, bizdiń logotıpimiz ózgeredi. Iаǵnı, halyqaralyq aqapart agenttigi atyna saı bolý úshin biz logotıpke keıbir jańa elementterdi engizdik. Biz saıt qoldanýshylarymen keri baılanys ornatyp, olardy tolǵandyratyn máselelerge de ún qosyp otyratyn boldamyz», dedi agenttiktiń bas dırektory.
Baspasóz-máslıhatynda «QazAqparat» ókilderi sondaı-aq, búginde saıttyń tehnıkalyq turǵyda jańalanýy men ózgerýine, dızaınnyń jańarýyna aıryqsha mán berilip otyrǵanyn, bulardyń barlyǵy agenttik saıtynyń árdaıym trendte bolý qajettiginen týyndap otyrǵanyn atap ótti.
Láıla EDILQYZY