G-Global alańy qurylǵannan bergi kezeńde álemniń kóptegen aldyńǵy qatarly ekonomısteriniń arasynda úlken bedelge ıe bolǵandyǵy belgili. Onyń ishinde jahandyq ekonomıkanyń qyr-syryn biletin Nobel syılyǵynyń laýreattary da jaqsy pikirde. Biz atalǵan alańnyń shyn máninde de, búkil jahandyq ekonomıka júıesinde jáne ártúrli elderde paıda bolatyn eń ózekti degen ekonomıkalyq máseleler týraly pikir alysatyn jumys alańyna aınalǵandyǵyn bilemiz. Sol sebepti de ol barlyq pikirlerdi jınaqtap, naqty usynystarymen G20-ǵa shyǵýǵa ázir otyr dep aıtýǵa bolady. Bul óz kezeginde damýshy elder bar, ekonomıkalyq qýatty elder bar, jalpy barlyq elder úshin táýekeldilikti tómendetip, úkimet basshylaryna óz qımyldaryn úılestirýge jan-jaqty múmkindik beredi.
Osy jerde kim osynyń barlyǵyn úılestirip otyrady degen zańdy saýal týyndaıdy. Álemdik ekonomıkanyń 70 paıyzyna ıelik etýshi elder me, álde bul Jer shary halqynyń barlyǵyna qatysty ma? Biz damýshy elderdiń bar ekendiginen de, ásirese, álemdik ekonomıkalyq daǵdarys jaǵdaıynda ekonomıkalyq jaǵdaıy kúrdeli elder bar ekendiginen de jaqsy habardarmyz. Osy turǵydan kelgende, árıne, bizdiń Memleket basshysynyń usynyp otyrǵany – árbir el kórpeni ózine qaraı tartpaı, ıaǵnı óz ekonomıkasyna qaraı bura tartpasy úshin birtutas qurylym qurý kerek ekendigi aıdan anyq. Shynynda da, bul barlyǵy úshin ortaq sheshim qabyldaýǵa uıytqy bolar edi. Bul qarjylyq naryqty retteýge de, OPEK elderi ózara kelisimge kele almaı otyrǵan munaı problemasyn sheshýge de qatysty. Basqa da tabıǵı resýrstarǵa jáne basqa da salalarǵa tikeleı qatysty.
Biz qazirgi kezde ekonomıkanyń jahandanýyna kelip tirelip otyrmyz, jahandaný jaılaǵaly qaı zaman. Árbir elde onyń jańǵyryǵy estiledi. Sol sebepti, álem elderiniń ekonomıkasy úshin atalǵan úderisterge óziniń paıdaly qaıtarymy arqyly yqpal etetin organ Elbasy Nursultan Nazarbaev usynǵan organ bolmaqshy. Al atalǵan úderisterge mindetti túrde yqpal etý kerek.
Serik BEKTURǴANOV,
Parlament Senatynyń depýtaty