Astanada jyl saıyn dástúrli túrde uıymdastyrylatyn qaıyrymdylyq maqsattaǵy iri halyqaralyq marafon ótti. Oǵan Premer-Mınıstr Kárim Másimov, Prezıdent Ákimshiliginiń Basshysy Ádilbek Jaqsybekov, birqatar Úkimet músheleri, otandyq jáne halyqaralyq kompanııalardyń ókilderi, Qazaqstanda tirkelgen elshilikterdiń qyzmetkerleri, sondaı-aq, alys jáne jaqyn 25 sheteldiń ókilderi qatysty. Marafonǵa qatysqandardyń arasynda Olımpıada chempıondary Serik Sápıev pen Danııar Eleýsinov, Olımpııa oıyndarynyń júldegerleri bar.
Tańǵy segizde bastalyp, tús aýa qorytyndysy shyǵarylǵan jarys barysynda 10 shaqyrymdyq qashyqtyqta áıelder arasynda Móldir Mekenbaeva birinshi bolyp máre syzyǵyn qıyp ótti. Erler arasynda Azamat Sabyrjanov jeńimpaz atandy. 21,1 shaqyrym qashyqtyqta birinshi oryn Samal Isabaevaǵa buıyrsa, erler arasynda Aǵzam Áripjanovtyń baǵy jandy. Al eń uzaq – 42,2 shaqyrym qashyqtyqta Aqmaral Meıirman men Aıdyn Qasen birinshi oryndardy ıelendi. «Sportshy otbasy» atalymynda Pákistannan kelgen otbasy jeńimpaz atandy. Marafon jeńimpazdary men júldegerlerine «Adıdas» fırmasynyń atynan tıisinshe qarjylaı syıaqy berildi.
Máre syzyǵynan ótkennen keıin qatysýshylar Rıo Olımpıadasynyń jeńimpazdarymen jáne júldegerlerimen estelik sýretke tústi. Sport sharasyna qatysýshylar men ony tamashalaýǵa jıylǵan jurtshylyq aldynda sóz alǵan Premer-Mınıstr Kárim Másimov:
– Barshańyzǵa kóp rahmet! Búgingi mańyzdy sharamen sizderdi quttyqtaımyn! – dedi.
Astana marafony qalada 2009 jyldan beri dástúrli túrde uıymdastyrylyp keledi. Qaıyrymdylyq maqsatta ótip jatqan sharanyń aıasynda 2009 jyldan bergi aralyqta 24 mln teńge jınalyp, túrli qaıyrymdylyq uıymdarǵa qoldaý jasalypty.
Nurhan ASQAR
Sýretti túsirgen
Erlan OMAROV