Oblys ákimi Berdibek Saparbaev pen oblystyq sottyń tóraǵasy Muraǵalı Áketaı quqyqtyq daýlardy retteý úshin tatýlastyrý rásimi ınstıtýtyn damytý máseleleri boıynsha ótken keńes barysynda ózara yntymaqtastyq jónindegi memorandýmǵa qol qoıdy.
Qazirgi kúni tatýlastyrý rásimi men daýlardy sheshýdiń balama joldaryn keńinen qoldaný jáne ony túsindirýge erekshe nazar aýdarylyp otyr. О́ńirde osy baǵytta turaqty túrde maqsatty jáne júıeli jumystar júrgizilip, oń nátıjelerge qol jetkizilýde.
– Adam quqyqtaryn qorǵaý tetikterin jetildirýdiń basym baǵyttarynyń biri – tatýlastyrý rásimi jáne daýlardy sotqa deıingi sheshýdiń balama joldary, sonyń ishinde medıasııa ınstıtýtyn qoldaný. Onyń ereksheligi – taraptardyń barlyq máseleni sot prosesine deıin sheshe alatyndyǵynda. Eń aldymen sottardyń jumysy jeńildeıdi, sondaı-aq, zańdy jáne jeke tulǵalarǵa memlekettik baj somasy qaıtarylady, – dep atap ótti óńir basshysy. Onyń aıtýynsha, qazirgi tańda oblys aýdandarynyń ákimdikterinde medıasııa kabınetteri ashylyp jatyr. Máselen, qaladaǵy medıasııa ortalyǵy Qazaqstan halqy Assambleıasy ǵımaratynda ashyldy.
Jyl basynan beri tatýlastyrý rásimin qoldaný nátıjesinde 724 azamattyq is aıaqtaldy, onyń 509-y kelisimge kelý arqyly sheshildi, 190 is boıynsha taraptar medıasııaǵa júgindi, jeke jáne zańdy tulǵalarǵa 72 mıllıon teńge kóleminde memlekettik baj qaıtaryldy. Aldaǵy ýaqytta árbir aýdanda ashylatyn medıasııa kabınetteri turǵyndarǵa turǵylyqty mekennen shyqpaı-aq, daýdy sheshý jáne ymyraǵa qol jetkizý maqsatynda kásibı emes medıatorlarǵa júginýge múmkindik beredi. Ákimdikter janyndaǵy medıasııa kabınetteri, sondaı-aq, azamattardy sot jáne kólik shyǵyndarynan bosatady. О́ıtkeni, mindetti memlekettik bajdy jáne ókilderdiń qyzmetin tóleý qajettiligi bolmaıdy.
Satybaldy SÁÝIRBAI,
«Egemen Qazaqstan»
Aqtóbe oblysy