Táýelsizdiktiń 20 jyldyǵyna arnaldy.
Bıylǵy Joldaýda ústimizdegi jyldyń basty oqıǵasy el Táýelsizdiginiń 20 jyldyǵyn laıyqty qarsy alý ekeni atap ótilgeni belgili.
Oblysta bul baǵyttaǵy sharalar qazirdiń ózinde bastalyp ta ketti. Oblys ortalyǵyndaǵy Nurpeıis Baıǵanın atyndaǵy oblystyq balalar kitaphanasy uıymdastyrǵan «Táýelsiz el — baqytty el!» atty kitap kórmesi týra táýelsizdiktiń 20 jyldyǵynyń tarıhı jylnamasy ispetti boldy. Kórmege qatysýshylarǵa shaǵyn konserttik baǵdarlama usynyldy.
Satybaldy SÁÝIRBAI, Aqtóbe.
Jastar avtokerýeni jolǵa shyqty
Oblys ákimdigi ishki saıasat basqarmasy jastar ortalyǵynyń dırektory D. Qaıypov, Jambyl oblysy bilimgerleri men jastar odaǵy birlestiginiń tóraǵasy A. Ájibaev jáne «Nur Otan» HDP oblystyq fılıalynyń «Jas Otan» jastar qanatynyń músheleri shalǵaıdaǵy Sarysý jáne Talas aýdandaryn baǵytqa aldy. Olardyń basyn qosqan aqparattyq-mádenı avtokerýenniń maqsaty – «Joldaý: jastardan –jastarǵa!» dep atalatyn aksııany oıdaǵydaı júzege asyrý. Buǵan deıin Jambyl jáne Jýaly aýdandaryndaǵy aýyl jastarymen kezdesip, bıylǵy Joldaýdyń mańyzyn eki jaqty únqatysý arqyly túsindirýmen aınalysqan avtokerýen músheleri mundaı tıimdi úgit-nasıhat jumystaryn endi alys aýdandardaǵy zamandastary arasynda jalǵastyrmaqshy.
Kósemáli SÁTTIBAIULY, Jambyl oblysy.
Kýálik nemeresine tapsyryldy
Alash arystarynyń biri Halel Dosmuhamedovtiń Qazaq eliniń keleshegi úshin atqarǵan eńbegi urpaqtar jadynda jańǵyryp turady. Ásirese, Atyraýda ǵalymnyń esimi berilgen ýnıversıtet aldynda eskertkishi ashylǵan. Bir kóshe ǵalym esimimen atalady. Elimizdiń ár óńirinde osyndaı este qaldyrý sharalary bar. Byltyr H. Dosmuhamedovke oblystyń qurmetti azamaty ataǵy berilgen. О́tken aptada osyǵan oraı ǵalym atymen atalatyn ýnıversıtette arnaıy kýálikti ǵalymnyń nemeresi Marat Dosmuhamedovke tapsyrý rásimi ótti. «Qazir Qyzylorda qalasynda turǵanymmen, elimizdiń ár óńirinde Halel atamnyń aty asqaqtaǵanyn bilip júremin. Bul men úshin, artyndaǵy urpaǵy úshin úlken mártebe», degen ol Atyraý ýnıversıtetiniń murajaıyna H.Dosmuhamedovtiń Sankt-Peterbýrgte, Oralda túsken sýretteriniń túpnusqalaryn tapsyrdy.
Joldasbek ShО́PEǴUL, Atyraý oblysy.
Sezd delegattary anyqtaldy
О́tken aptada oblys áıelderiniń basyn qosqan konferensııa bolyp ótti. Onda aqpannyń ortasynan 1 naýryzǵa deıin ótetin «Tilekter tizimi» respýblıkalyq aksııasynyń sheńberinde júrgiziletin jumys josparlary talqylandy. Adam quqyǵy jónindegi halyqaralyq bıýronyń Qostanaı oblystyq fılıalymen birlesip «Áıelder kóshbasshylyǵy», «Áıelder ozbyrlyqqa qarsy» taqyryptarynda semınarlar ótedi. Sonymen qatar jetim balalarǵa kómek aksııasy da uıymdastyrylady. Osy konferensııada 5 naýryzda ótetin respýblıkalyq áıelder sezine oblystan qatysatyn delegasııa quramy jasaqtaldy. Olardyń arasynda qoǵamdaǵy belsendi áıeldermen qatar, 20 bala taýyp, tárbıelep otyrǵan Qamash Seıitjanova, ataqty mehanızator, Eńbek Eri Kámshat Dónenbaeva jáne jastar bar.
О́mir ESQALI, Qostanaı.
Salyq tóleýshilerge jaqsy jaǵdaı
Egemen el atanyp, táýelsizdikke qol jetkizgennen bergi jerde memleketimizdiń irgesi nyǵaıa túsip keledi. Shańyraǵymyz shaıqalmaı, tútinimiz túzý shyǵý úshin salyq salasynyń ýyǵy berik bolýy kerektigi aıtpasa da túsinikti. Soǵan oraı ana bir jyldary qańyrap bos qalǵan burynǵy kásipshiler odaǵynyń ǵımaraty qalalyq salyq komıtetine berilgen edi. Jýyrda atalǵan komıtet buǵan qosymsha jańa ǵımaratpen tolyqty. Solaısha salyq tóleýshilerge qyzmet deńgeıi burynǵydan da jaqsara tústi. Jańa ǵımarattyń ashylý saltanatyna oblys, qala basshylary Berdibek Saparbaev pen Aıbek Kárimov qatysty.
Dáýlet SEISENULY, Semeı.
Naýryzdyń ortasyna deıin jalǵasýda
Oblystyq «Oral О́ńiri» gazeti muz astyndaǵy balyqtardy tunshyǵýdan qutqarý aksııasyna bastamashy boldy. Oǵan qatysýshylar Shaǵan ózeninde 523 oıyq, 10 sýat jasady. Shara kezinde muzdyń qalyńdyǵy 50-55 santımetrge jetkeni anyqtaldy. Sonymen birge, qys kezinde balyqty tunshyǵýdan qorǵaý sharalarymen oblysta «Esbosynov» jeke kásiporny aınalysyp keledi. Olar bul isti naýryzdyń ortasyna deıin jalǵastyrmaq. О́zen-kólderdiń betin muz qursap, qalyń qar jabýy, sóz joq, balyqtardyń tunshyǵýyna, tipti, qyrylýyna ákelip soqtyrady. Bul jáıt sý quramyndaǵy otteginiń azaıyp ketýinen oryn alady. Atalmysh aksııanyń asa qajettiligi de osynda, – deıdi Batys Qazaqstan agrarlyq-tehnıkalyq ýnıversıtetiniń dosenti Márlen Shúkirov.
Temir QUSAIYN, Oral.