* 9 shildede Abaı atyndaǵy Qazaq memlekettik opera jáne balet teatrynda Sultanmahmut Toraıǵyrovtyń týǵanyna 100 jyl tolýyna arnalǵan saltanatty kesh uıymdastyryldy.
*20-23 shilde aralyǵynda Elbasy Nursultan Nazarbaevtyń Taıland Koroldigine resmı sapary boldy. Taıland Premer-mınıstri Chýan Lıtpaımen kezdesý kezinde eki el arasyndaǵy qarym-qatynastarǵa baılanysty máseleler keń aýqymda talqylandy. Sondaı-aq, Qazaqstan Prezıdenti Taıland koroli Pýmıpon Adýlıadetpen (Rama IH) kezdesti.
*28 shildede О́zbekstan Prezıdenti Islam Karımov qysqa merzimdi jumys saparymen Almatyǵa keldi. Nursultan Nazarbaev pen Islam Karımov eki eldiń jaqyndasa túsýi úshin múmkindikter mol ekenin atap kórsetti.
* 7 tamyzda Máskeýde Elbasy Nursultan Nazarbaev pen Reseı basshysy Borıs Elsınniń bastamasy boıynsha bes memleket – Qazaqstan, Qyrǵyzstan, Reseı Federasııasy, Tájikstan jáne О́zbekstan basshylary kezdesti. Kelissóz barysynda Táýelsiz Memleketter Dostastyǵy úshin mańyzy bar birqatar máseleler talqylandy. Bul týraly «Egemen Qazaqstan» gazetiniń 10 tamyz kúngi nómirinde «Ortalyq Azııa memleketteri men Reseıdiń yntymaqtastyǵy kúsheıe túsedi» taqyrybymen maqala jarııalandy.
* 12 tamyzda Abaı atyndaǵy opera jáne balet teatrynda qazaqtyń kórnekti aqyny Maǵjan Jumabaevtyń týǵanyna 100 jyl tolýyna arnalǵan saltanatty kesh ótti.
*22 tamyzda qazaq halqynyń dańqty perzenti, respýblıkany shırek ǵasyrǵa jýyq ýaqyt boıy basqarǵan asa kórnekti memleket jáne qoǵam qaıratkeri Dinmuhamed Ahmetuly Qonaev 82 jasqa qaraǵan shaǵynda qaıtys boldy.
* 25 tamyzda Qazaqstan halqy D.A. Qonaevty sońǵy saparǵa shyǵaryp saldy.
* 26 tamyzda Kókshetaýda Qazaqstan, О́zbekstan, Qyrǵyzstan prezıdentteri – Nursultan Nazarbaev, Islam Karımov pen Asqar Aqaev kezdesti. Memleket basshylary astyq pen gaz jetkizilimi týraly ýaǵdalastyq jasady.
*28 tamyzda Prezıdent Nursultan Nazarbaevtyń Almatyda ótken ıadrolyq qarýǵa qarsy halyqaralyq kongreske qatysýshylarǵa quttyqtaýy jarııalandy. «Osydan týra 44 jyl buryn Semeı polıgonynda jasalǵan alǵashqy ıadrolyq jarylystan keıin bizdiń halqymyzdyń «atomdyq ómiriniń» qaıǵyly kezeńi bastaldy. Jyl ótken saıyn adamdardyń densaýlyǵynyń negizi kúırep, názik tabıǵı orta buzyla berdi. Tán azaby da, rýhanı qasiret te bizdiń júregimizdi áli kúnge syzdatýda. Iаdrolyq esýastyqtyń búkil adamzat balasyna qandaı qısapsyz shyǵyndar men orny tolmas qurbandyqtar ákeletinin biz bilemiz», – delingen Elbasy quttyqtaýynda.
*10 qyrkúıekte Reseı mádenıetiniń Qazaqstandaǵy kúnderi bastaldy. Eki eldiń mádenıet qaıratkerlerine joldaǵan quttyqtaýynda Elbasy Nursultan Nazarbaev Reseı mádenıeti kúnderin ótkizýdiń qandaı da bir ótkinshi sátke saıası qurmet bildirý, ne áldebir esep turǵysynan upaı jınaý maqsatynda emes, naǵyz jaqsy kórshi-dostardyń júrek qalaýynan týyndap otyrǵandyǵyn atap kórsetti.
* 15 qyrkúıekte Almatyda túrki poezııasynyń ekinshi festıvali ashyldy. Festıvalǵa qatysýshylardy Qazaqstan Prezıdenti Nursultan Nazarbaev quttyqtady.
* 17 qyrkúıekte Fransııa Prezıdenti Fransýa Mıtteran Qazaqstanǵa resmı saparmen keldi. Kelissóz barysynda N.Nazarbaev pen F.Mıtteran saıası, ekonomıkalyq, mádenı, ǵylymı jáne basqa da salalarda eki jaqty yntymaqtastyqty budan ári damytý nıetterin bildirdi.
* 29 qyrkúıekte Prezıdent janyndaǵy Memlekettik saıasat jónindegi
ulttyq keńestiń májilisi ótkizilip, onda Qazaqstan qoǵamynyń ıdeıalyq toptasý máseleleri qaraldy. Keńeste sóz sóılegen Nursultan Nazarbaev belgili bir ıdeologııalyq baǵdarlarsyz birde-bir derbes memleket ómir súre almaıtyndyǵyn atap kórsetti.
*2 qazanda «Qazaqstan halyq birligi» odaǵynyń birinshi sezi ótti. Elbasy Nursultan Nazarbaev sezde sóz sóıledi. «Odaqtyń buqaramen jumys isteýdiń aıqyn beınelengen ıdeologııalyq baǵdarlamasy bolýy tıis. Bul olardyń memlekettiń bolashaǵyn sezinip, maqsattar men mindetterin túsinýine kómektesedi. Ideıalyq baǵdarlardyń dogmalarǵa emes, ómirdiń aqıqat shyndyǵyna súıengeni mańyzdy», dedi Prezıdent.
* 9 qazanda «Egemen Qazaqstan» gazetinde Qazaqstan Prezıdenti Nursultan Nazarbaevtyń «Qazaqstannyń bolashaǵy – qoǵamnyń ıdeıalyq birliginde» atty eńbegi jarııalandy. Bul eńbekte Prezıdenttiń reformalardyń prınsıpti baǵyttary men mazmuny jónindegi kózqarastary aıtylyp, jurtshylyqqa aldaǵy keleshektiń maqsaty túsindirilgen.
* 12 qazanda Joǵarǵy Keńestiń 11-shi sessııasy jumysyn bastady. Sessııanyń alǵashqy kúni Prezıdent Nursultan Nazarbaev respýblıkadaǵy áleýmettik-ekonomıkalyq jaǵdaı jáne júrgizilip jatqan reformalardy jandandyrý týraly baıandama jasady. «Aldymyzda turǵan mindetterdiń asa ótkirligine qaramastan, Qazaqstannyń egemen memleket retinde qalyptasýy turlaýly sıpat aldy dep nyq aıtýǵa bolady. Bizdiń ilgerileýimizdiń basty da senimdi negizi ultaralyq birlik, turaqtylyq, toptasý, halyqtyń rýhanı kelisimi bolyp tabylatyny sózsiz. Bul – Qazaqstandaǵy reformalaý men progrestiń mańyzdy sharty, bastaý alar kózi», dedi Elbasy.
* 18 qazanda Prezıdent N.Á.Nazarbaev resmı saparmen Beıjińge bardy. 21 qazanǵa deıin bolǵan bul sapar barysynda Nursultan Nazarbaev QHR Tóraǵasy Szıan Szemınmen kezdesti. Kelissózderdiń nátıjesinde Qazaqstan men QHR arasyndaǵy dostyq qarym-qatynas negizderi týraly Birlesken Deklarasııaǵa, sondaı-aq, áýe qatynastary týraly, turǵyndarǵa vızalardy rásimdeý tártipteri týraly, halyqaralyq avtokólik qatynastary týraly, qyzmet babymen azamattardyń saparlary týraly kelisimderge qol qoıyldy.
* 21 qazanda Qazaqstan Prezıdenti Nursultan Nazarbaev Mońǵolııaǵa resmı saparmen bardy. Memleket basshysy Mońǵolııa Prezıdenti Pýnsalmaagıın Ochırbatpen kezdesip, ekijaqty kelissózder júrgizdi.
*24 qazanda Prezıdent N.Nazarbaev elimizge resmı saparmen kelgen AQSh-tyń Memlekettik hatshysy Ýorren Krıstoferdi qabyldady. Kezdesý barysynda taraptar ekijaqty qarym-qatynas pen birqatar halyqaralyq máselelerge toqtaldy. AQSh syrtqy saıasat vedomstvosynyń basshysy Qazaqstannyń aımaqtaǵy beıbitshilik pen qaýipsizdikti nyǵaıtýdaǵy mańyzdy rólin joǵary baǵalady.