Eńbek ónimdiligin arttyrý arqyly otandyq kásiporyndardyń básekelestikke qabilettiligin kúsheıtý kerek. Bul týraly elordada Investısııalar jáne damý mınıstrliginiń muryndyq bolýymen ótken ǵylymı-tájirıbelik konferensııada aıtyldy. Alqaly jıynǵa birqatar mınıstrlikter ókilderi, «Atameken» Ulttyq kásipkerler palatasynyń ókilderi, otandyq jáne sheteldik sarapshylar qatysty.
Investısııalar jáne damý mınıstriniń birinshi orynbasary Albert Raýdyń aıtýynsha, Indýstrııalyq-ınnovasııalyq damytý memlekettik baǵdarlamasynyń alǵashqy besjyldyǵynda el ekonomıkasyn damytýǵa qajetti alǵysharttar qalyptasty. Jahandyq ekonomıkada báseke kúsheıgen saıyn, ekonomıkalyq ósimdi, halyqtyń laıyqty turmysyn saqtap qalý máselesi kúrdelene bermek. Al eńbek ónimdiligin arttyrý ekonomıkalyq ósimge tikeleı yqpal etedi. Osy oraıda, memleket sheshýshi salalardaǵy eńbek ónimdiligin arttyrýǵa qoldaý kórsetýi kerek, dedi Albert Raý.
Mınıstrdiń birinshi orynbasary aıtyp ótkendeı, 2010-2014 jyldary elimizde ındýstrııalyq damýǵa qajetti bazalar jasaldy. Zańnamalyq baza jetildirildi, ınfraqurylym qarqyndy túrde damydy. Bul Indýstrııalyq-ınnovasııalyq damý baǵdarlamasynyń ekinshi kezeńinde jemisin bere bastady. Osylaısha, 2016 jyldyń alǵashqy jartyjyldyǵynda óndirilgen barlyq ónimniń besten bir bóligi Indýstrııalandyrý kartasynyń aıasynda jasalǵan nemese jańǵyrtylǵan jobalarǵa tıesili bolyp otyr.
Osy konferensııada aıtylǵan derekterge súıensek, elimizde sońǵy birneshe jyl ishinde 7 myń shaǵyn, orta jáne iri kásiporyndarǵa memlekettik qoldaý kórsetilgen. 160 myńnan astam jańa jumys oryndary ashylǵan. Ekonomıkanyń sheshýshi salalaryn jańǵyrtýǵa, jetildirýge mán berý kerektigi únemi aıtylyp keledi. Shyn mánisinde bul qadamnyń durystyǵyn túsingender ózderiniń bastamalaryna nyq senimdi. Al ony túsinbegender Dúnıejúzilik saýda uıymy, Keden odaǵy syndy uıymdar ekonomıkamyzdy yǵystyryp tastaıdy dep baıbalamdaýǵa beıim. Eger básekege qabiletti bolǵymyz kelse, ondaı qorqynyshqa boı aldyrmaýymyz kerek. Bul búgingi zaman talaby, jahandyq ekonomıkadaǵy ahýaldar bizden batyldyqty, básekege qabiletti bolýdy talap etedi, degen birinshi vıse-mınıstr jetildirý men jańǵyrtý isinde batyl qadam jasaǵan birqatar kásiporyndy úlgi retinde atap ótti.
Konferensııa barysynda ekonomıkalyq sektorda eńbek ónimdiligin arttyrýǵa basymdyq bere otyryp, kásiporyndardyń básekege qabilettiligin jaqsartý máselesi talqylandy. Jıylǵandar memlekettik sektor men bıznes qaýymdastyǵynyń arasynda ózara tıimdi dıalog ornatý joldaryn qarastyrdy.
Arnur ASQAR,
«Egemen Qazaqstan»