Astananyń 10 jasar turǵyny Ámir Qusaıynovtyń armany – ataǵy jer jarǵan sportshy bolyp, baıraqty básekede top jaryp, chempıon atanyp, elimizdiń Ánuranyn oınatyp, kók týyn bıikke kótertý. Qaı balany da nebir asqaq armandar alǵa jeteleıtin shyǵar, al Ámirdiń jaǵdaıynda muny ata-ana men barsha jaqyn-jýyq qosyla tileıtin erekshe qubylys, tipti muǵjıza deýge bolady. О́ıtkeni Ámir balalardyń serebraldy sal aýrýymen aýyrady. Al ony osy úkili armanǵa jeteleýshi – «BI-Juldyzaı» korporatıvtik qaıyrymdylyq qory.
Ámirdiń anasy Jazıranyń aıtýynsha, «Ámir ómir esigin ashqanda alǵan jaraqattan zaqymdanyp, balalardyń serebraldy sal aýrýyna shaldyqty. Emdelý úshin barmaǵan jerimiz joq, shetelge de júgindik, biraq aıtarlyqtaı nátıje bolmady. Sodan 7 jasqa deıin balamdy dári-dármektermen emdep-emdep, aqyry úmit jetelep osy ortalyqqa kelip, 3 jyldan beri mamandardyń kómegine júginnen bastap, til tımesin, Ámirdiń jaǵdaıy kádimgideı jaqsardy. Qazir lıseıde, gımnazııalyq 4 synypta oqyp júr, úlgerimi de jaqsy. Ustazdary baǵdarlamany jaqsy ıgeredi, oǵan ózge balalarǵa qoıǵandaı talap qoıamyz, barlyǵyn oryndaıdy», deıdi.
Bizdiń oıymyz Ámirdi ómirge beıimdeý, eldiń bári ata-ana tárizdi emes, ómirdiń buralańdy joldarynda, myna qoǵamda barlyǵy birdeı bastan sıpaı bermeıdi ǵoı, sodan erteń áleýmettik ortada qatarynan qalyp qoımasyn deımiz. Al onyń óziniń de qulshynysy keremet, qazaqstandyq úzdik sportshylardy qadaǵalap, jeńisterine qýanyp, solardaı bolsam dep armandaıdy. Osynyń barlyǵy ortalyq mamandarynyń, Ámirmen kúndelikti jattyǵý jasaıtyn nusqaýshy Sadyq Báıimbetovtiń arqasy. О́tkende Ámirdiń jattyǵýlaryn beınetaspaǵa túsirip, olımpıada chempıony Ilıa Ilınge kórsetken eken, Ilıa batyr azamattyq jasap, ortalyqqa arnaıy kelip, Ámirge úlken qýanysh syılady. Ámirdiń armany – elge tanymal ataqty azamat bolý dep óz úmitin de ortaǵa saldy.
Ámirdiń ózin sózge tartqanda : «Ilıa Ilın – meniń kýmırim. Alǵashynda saǵan Ilın keledi degenge nana almadym. Biraq ol shynymen de keldi. Sondaı qatty qýandym jáne ol maǵan aýrýdy jeńip, shynyǵyp júrgenimdi, shtanga kótergenimdi maqtap, altyn medal berdi. О́ziniń qalaı jattyǵatynyn aıtty. Men qazir Sadyq aǵa bergen aýyr girdi kóterip júrmin, al úlken bolǵanymda Ilıa tárizdi shtanga kóteremin. Synyptastarym maǵan Ilıanyń medal bergenine nanbaıdy. Ol meniń eń birinshi medalim bolǵasyn, tórge ilip qoıǵanymdy aıttym. Endi Ilınmen túsken fotomdy kórsetemin, sonda qalaı nanbas eken», – deıdi.
Bıznestiń áleýmettik jaýapkershiligi jaıyndaǵy sóz jıi áńgime ózegine aınalady. Alaıda bıznestiń áleýmetke jasar sharapaty kóp rette bir ret kórsetilgen kómekpen, áldebir sharany jan-jaqtan tilshiler shaqyryp, jalpaq jurtqa jarııa etip, dabyrlatyp ótkizýmen shektelip jatady. Al kún saıyn, jyldar boıyna múgedek balalardy qatarǵa qosýda tynbaı eńbektený naǵyz izgi júrektilikti, áleýmet aldyndaǵy shynaıy jaýapkershilikti kórsetedi emes pe?! BI Group kompanııasynyń korporatıvtik qoldaýymen qurylǵan «BI-Juldyzaı» KQ kómegimen byltyrǵy jyly Ámir tárizdi aýyratyn 100 balaǵa ota jasalyp, 287 bala ortalyqtyń kómegine júginipti. Al bıylǵy jyl olardyń qarasy edáýir ulǵaıǵan. 560-tan astam balanyń erteńine úmit oty jaǵylǵan.
Ashylǵannan bergi 11 jyl boıyna «BI-Juldyzaı» KQ túrli múgedek balalary bar qınalǵan ata-anaǵa qarlyǵashtyń qanatymen sý sepkenindeı, olarmen birge qınalyp, qıyndyǵyn birge kóterisýde eken. Bizge tek serebraldy sal aýrýyna shaldyqqandar emes, Daýn aýrýy, tutyqpa-kekesh, gıdrosefalııa, skalıoz, maıtabanǵa ushyraǵan balalar da keledi, olardyń árqaısyna jeke-jeke deneni shynyqtyratyn jattyǵý, sylaý jasalyp, psıholog, defektolog pen logoped syndy mamandar jumys isteıdi. Bizge alǵash kelgende ata-ana júıkesi juqaryp, ómirge nala aıtyp kiretin bolsa, qazir ózińiz kórgendeı jaımashýaq, balalaryn mamandardyń qolyna tapsyryp kútip otyrady. Eń bastysy, ózinde de, balasynda da bizge degen, ózderiniń qıyndyqtarynyń artta qalatynyna degen senim uıalaıdy. Senesiz be, biz jylda tusaýkeser rásimin saltanatty jaǵdaıda ótkizemiz. Kózińizge elestetip kórińizshi, olar 2 jas pen 12 jas aralyǵyndaǵy balalar. О́mirinde aıaǵyn jerge tireı almaǵan balasynyń qadam basqanyn kórgendegi ata-ananyń qýanyshy qandaı?! Sol sátti kórý úshin ǵana neshe jyl ter tógýge bolady emes pe?! Jáne olardyń árbireýiniń artynda qanshama kóz jasy, uıqysyz túnder, tógilgen ter men qajyr qaırat bar deseńizshi dep bizben áńgimelesken ortalyq qyzmetkeri Altynaı Muratjanqyzy: «Balalardy neǵurlym erterek ákelse, soǵurlym nátıjesi de jaqsy, al súıek qatyńqyrap ketkende qıynyraq. Demeýshilerimizdiń kómegimen Qytaı, Germanııa, Chehııa, Reseı, Lıtvadan shaqyrylǵan asa joǵary sanattaǵy professor, doktorlar kelip qanshama balaǵa ota jasady. №2 qalalyq aýrýhanada ota jasalady dep kezekte turǵan balany aldymen ózimizde emdik deneshynyqtyrý jattyǵýlarymen aldyn ala daıyndaımyz. Áıtpese jyldap qımyl kórmegen bulshyq etterge qansha ota jasalsa da oń ózgeris bola bermeıdi. Sondyqtan biz otanyń aldynda da, sodan keıin de saýyqtyryp, qatarǵa qosýmen júıeli túrde aınalysamyz. Qudaıǵa shúkir, jaqynda taǵy bir top balany otaǵa daıyndap, endi bir tobynyń tusaýyn kespekshimiz. Bul – bizdiń úlken qýanyshymyz. Jalpy Eýropa elderinde qazir bizderdegideı balalar múgedektigi joq, olardy kishkentaı kúninen osyndaı ortalyqtarda saýyqtyrýmen aınalysyp, olardy áleýmettik ortaǵa kiriktirip jibergen», deıdi.
Ortalyqtyń qyzmetine endi bir júginýshi Gúlzıranyń eki balasynyń ekeýi de múgedek: «Qyzym týǵannan múgedek. Býynyn múlde ustaı almaı bylq-sylq etetin. Alyp kelgenimde dárigerler shoshyp ketken, endi qazir otyra alatyn jaǵdaıǵa jetti, al ulym eńbekteýge talpynýda, osynyń bárine aınaldyrǵan 8 aıdyń ishinde qol jetti. Shúkir, balapandarym júrip ketse armanym joq, qazirgi kórgen qıyndyǵym kórgen tústeı bolar. Páterimiz joq, keıde tipti isher tamaǵymyzdy da taba almaı qalatyn kúnderimiz kóp, alaıda sonyń bárin elemes edim, balapandarym óz aıaqtarymen júrip ketse», deıdi.
Al Ámirdiń Sadyq aǵasy: «Eń aldymen ata-anamen til tabysý qajet. Basyna taýqymet túsken, baýyr eti balasynyń qınalǵanyn kórip, kómektese almaǵan ata-anada qaı jóndi júıke bolady. Shyrtyldap, sál shertip qalsań jarylaıyn dep turady. Keıde basyńnan sóz asyryp, úndemeı qalyp, keıde kishkentaı bir tabysyna maqtap qoımasań jáne eń aldymen balalardy jaqsy kórmeseń, olardyń janynyń aýyrǵanyna, múshkil háline degen aıaýshylyq pen janashyrlyq taba almasań, bul jerge jumys isteımin dep kelip te keregi joq. Ámirdiń boıynda sportqa degen qyzyǵýshylyq pen tabandylyq bar, shtangaǵa qaraǵanda kózi janady. Sony kórip anasyna: «Eger men Ámirge kúndegiden 10-15 mınýt artyǵyraq ýaqyt bólsem, siz tosa alasyz ba?» desem, ol kisi: «Jaqsy, asyqpaı kútemin», dedi. Birde Ámirge: «Káne, kótershi, men seniń qandaı myqty ekenińdi kýmırińe kórsetemin», dep qaltafonyma túsirip aldym. Kezekti jattyǵýǵa sport keshenine barǵanda Ilıany kórip qaldym da sálemdesip, jaǵdaıdy túsindirdim. Sózbuıdaǵa salmaı, sol jerde birden beıne sálem joldap: «Ámir, jaraısyń, men jaqyn arada saǵan mindetti túrde baramyn», dedi. Naǵyz er jigit. Kelip balalardy qoldap, olarmen otyryp áńgimelesip, rýh berip ketti. Alda bolatyn tusaýkeserge Ilıa batyrdy shaqyrǵaly otyrmyz», dedi.
Juldyzaılyqtardyń nebary 200 sharshy metrdi alyp jatqan orynjaıynan túrli oı arqalap jumysyma oraldym. Qanshama jaqsy ister atqaryp jatqan, qaıyrym men izgiliktiń oshaǵyna otyrǵan orny tarlyq etedi eken. BI Group kompanııasynda jumys isteıtin barlyq adam aı saıyn eńbekaqylarynan bólgen jarna negizinde balalarǵa kómektesip jatqan ortalyqty ózgeler demese de artyq etpes edi. Bizdiń elimizde de Eýropadaǵydaı aýrý balalar joıylyp, qoǵam jylaǵan bala men ata-ananyń kóz jasyn súrtse, ol Allaǵa jaǵar is bolar edi ǵoı degen oıdyń jeteginde osy joldar jazyldy.
Anar TО́LEÝHANQYZY,
«Egemen Qazaqstan»