Premer-Mınıstr Baqytjan Saǵyntaevtyń tóraǵalyǵymen Úkimet otyrysy ótti. Onda áleýmettik mańyzy bar taýarlar baǵasynyń qymbattaý sebepteri aıtyldy.
Kún tártibindegi másele boıynsha baıandaǵan Ulttyq ekonomıka mınıstri Qýandyq Bıshimbaev azyq-túlik taýarlarynyń qymbattaý sebepterin túsindirdi.
«Ulttyq ekonomıka mınıstrligi naryqtar teńgerimine taldaý júrgizdi, nátıjesinde ishki naryqtaǵy áleýmettik máni bar taýarlar baǵasynyń ósýine áser etetin birqatar sebepter anyqtaldy. Birinshisi – álemdik naryqtardaǵy baǵa jaǵdaıatynyń ózgerýi jáne ulttyq valıýtanyń álsireýi ımporttyq jetkizýlerge táýeldi taýarlarǵa áser etti. Olar boıynsha otandyq taýarlardy tutynýdyń qamtamasyz etilýi 60 paıyzdan tómen», – dedi Q.Bıshimbaev. Mınıstr sondaı-aq, buǵan aǵymdaǵy jyly tabıǵı monopolııalardyń qyzmetterine tarıfterdiń jáne JJM baǵasynyń artýy da yqpal etip otyrǵanyn atap ótti. Taǵy bir sebep maýsymdyq aýytqýdyń áseri.
«Jyl saıyn taýardyń jekelegen túrleri boıynsha qoımadaǵy qordyń azaıýyna baılanysty olardyń baǵasy qubylyp turady. Bul eń aldymen kókónister – kartop, sábiz, pııaz, qyryqqabat, qyzylsha. Baǵa ádette, mamyr-tamyz aılarynda kóteriledi», – dedi mınıstr. Tórtinshi sebep – eksporttyq jetkizýdiń áseri. Eýrazııalyq ekonomıkalyq odaq aıasynda, Reseı men Qyrǵyzstannyń shekara mańyndaǵy baǵalardyń ósken jaǵdaıda ishki naryqtaǵy taýarlar quny da kóteriledi. Q.Bıshimbaevtyń málimdeýinshe, búgingi tańda joǵaryda atalǵan faktorlar baǵanyń ósýine áser etti, jyl sońyna deıin aıtarlyqtaı ósim bolmaıdy dep kútilýde.
Resmı málimetterge súıensek, jyl basynan bastap tutyný baǵasynyń ındeksi 5,4 paıyzǵa, onyń ishinde azyq-túlik taýarlar 5,2 paıyzǵa ósti. 2016 jylǵy 30 tamyzdaǵy jaǵdaı boıynsha jyl basynan áleýmettik mańyzy bar azyq-túlik taýarlaryna baǵa ındeksi 9 paıyzdy qurady.
Úkimet otyrysynda negizinen bes másele qaralǵan bolatyn. Aıtalyq, áleýmettik mańyzy bar azyq túlik taýarlarynyń baǵasyn turaqtandyrý, jumyspen qamtý, memlekettik qyzmet kórsetý salasyn arttyrý, aldaǵy jylytý maýsymyna daıyndyq jáne egin jınaý naýqany talqylandy.
Dınara BITIKOVA