Bul týraly búgin Úkimet otyrysynda aıtyldy. Premer-Mınıstr Baqytjan Saǵyntaev turaqtandyrý qorlaryna azyq-túlik alýǵa bólingen qarjyny tıisti deńgeıde ıgerý kerektigin málimdedi. Sondaı-aq, oblys ákimderinen turaqtandyrý qorlaryn azyq-túlikpen toltyrýǵa bólingen qarjy depozıtterde nege bostan bos ıgerilmeı jatqanyn túsindirýdi talap etti.
B.Saǵyntaev elimizdiń óńirlerinde qaraqumyqtyń baǵasy eleýli óskenin aıta kele, osy rette jaqyn arada bul máseleni sheshýdi tapsyrdy. О́z kezekterinde Úkimet otyrysyna selektorlyq baılanyspen shyqqan óńir ákimderi bul baǵyttaǵy jumystardy taıaý arada retke keltiretinine ýáde etti.
«Árıne, birinshi kezekte biz baǵanyń negizsiz óspeýin baqylap otyrýymyz kerek. Maýsymdyq jáne basqa da sebeptermen taýar qunynyń joǵarylaýy oryn alady, biraq ta baǵaǵa qatysty tıisti sheshimder jasalǵanymen, kóp jaǵdaılarda jumystardyń atqarylmaýy saldarynan ósip jatady. Bizde óndiristi jáne ónimniń saýdasyn iske asyrýdy yntalandyrýǵa baılanysty, baǵany yryqtandyrýǵa tetikter jetkilikti. Alaıda, bul tetikter jumys istemeı tur. Otyrysta baıqaǵanymyzdaı, jergilikti jerlerde ákimdikter tarapynan qadaǵalaý bolmaı tur», – dedi Premer-Mınıstr.
Osy rette B.Saǵyntaev baǵany yryqtandyrýda júıeli sharalar qabyldaý kerektigin nyqtap jetkizdi. Ol: «Bizdiń keıbir áripstesterimiz laýazymdaryn alǵannan keıin bazarlarǵa baryp, baǵalardy ınspeksııalap jatady. Degenmen de olar barǵan kezde, bazarlarda taýarlar men ónimder baǵasyn saýdagerler lezde tómendetip tastaıtynyn óte jaqsy biledi. Olar ketkennen keıin saýdagerler eski baǵany qaıta qoıady. Bul óz kezeginde bedelqumarlyqtan basqa eshteńeni bermeıdi. Sondyqtan naqty qajetti júıeli sharalardy júzege asyryńyzdar», – dedi. Sondaı-aq, Úkimet basshysy Qazaqstanda óndiriletin ónimder boıynsha baǵany ustap turýǵa tolyq negiz bar ekenin alǵa tartty. Sonymen qatar, Ulttyq ekonomıka mınıstrligine baǵa saıasatynda rettegish tetikterdi tıisti deńgeıde paıdalanýdy eskertti.
Dınara BITIKOVA